Қазақстанда зейнетақы жинағын мерзімінен бұрын пайдалануға қатысты ереже өзгереді. Енді "ең төмен жеткіліктілік шегі" бұрынғыдай қарапайым формуламен емес, адамның бүкіл өмірлік табысы мен болашақ шығынын ескеретін жаңа жүйе бойынша есептеледі. 

Премьер-министр Олжас Бектенов зейнетақы жинақтарының "ең төмен жеткіліктілік шегі" (ПМД) есептеу тәсілі туралы тиісті қаулыға қол қойды.

Бұл шек – Бірыңғай жинақтаушы зейнетақы қорындағы (БЖЗҚ) шотта міндетті түрде қалуы тиіс ең аз ақша. Егер жинақ осы сомадан көп болса, артық бөлігін үй алуға немесе емделуге жұмсауға болады.

Жаңа ереже бойынша бұл шек енді бұрынғыдай оңай есеппен емес, бірнеше факторды ескеріп анықталады. Оның ішінде адамның жасы, қанша өмір сүруі мүмкін екені, ең төмен зейнетақы мөлшері, болашақ төлемдер мен жарналар, сондай-ақ зейнетақы жинағының болжамды табысы бар.

Қарапайым тілмен айтқанда, мемлекет әр адам зейнетке шыққаннан кейін қанша ақша керек болатынын алдын ала есептеп, шотта қанша сома қалуы тиіс екенін соған қарай белгілейді.

Есептеу кезінде мыналар ескеріледі:

 адамның жасы;

 зейнетке шығуға дейінгі жылдар саны;

 зейнетақы алатын болжамды кезең;

 ең төмен мемлекеттік зейнетақы;

 болашақ зейнетақы жарналары;

 зейнетақы жинақтарының инвестициялық табысы;

 төлемдердің жыл сайынғы өзгерісі және басқа да факторлар.

Қазақстандықтардың зейнетақы жинақтарының кірісі нөлге дейін төмендеді – 

Есептеу жүйесі "өмір бойы төлем" қағидасына негізделеді. Яғни адам зейнетке шыққаннан кейін оған өмір бойы жететін ақша көлемі алдын ала есептеледі. Сонымен қатар орташа өмір сүру ұзақтығы мен арнайы есептеу коэффициенттері де қолданылады. Олар зейнетақы қанша уақыт төленетінін нақтырақ болжауға көмектеседі.

Бұдан бөлек, инвестициялық табыс та ескеріледі. Яғни зейнетақы жинағы тек қазір шоттағы ақша ретінде емес, болашақта өсетін табыспен бірге қарастырылады. Жаңа ереже ресми жарияланғаннан кейін 10 күн өткен соң күшіне енеді.