Танымал продюсер Гүлзира Айдарбекова жеке өміріндегі ауыр кезеңді айтып берді. Ол “Шайдың қыздары” подкастында ұлы Қайрат Нұртасты дүниеге әкелгеннен кейін бірнеше рет құрсақ көтеріп, сәбиінен айырылғанын жеткізді. 

Продюсердің сөзінше, алғашқы қайғылы жағдай ағасының қайтыс болғаны туралы суыт хабарды естігеннен кейін болған. Сол кезде ол қатты уайымдап, құрсағындағы сәбиінен айырылған.

“Баланы шетінеп кетті дейміз ғой. Бірде ағамды іздеп Түркістанға қарай қоңырау шалдым. Ол кезде смартфон жоқ. Сөйтсем, ол досының үйінде екен. Қоңырауды ағамның досының үйіндегі жеңгеміз көтерді де “Гүлзира, сенсің бе? Сенің ағаң қайтыс болды” деді. Мен тіпті “кім?” деп сұрамастан, телефонды қоя салып, әр ағамды бір елестеттім. Суыт хабарды естіп, қатты уайымдап қалдым. Сол кезде құрсағымдағы сәбиім шетінеп кетті”, – дейді ол.

Гүлзира Айдарбекованың айтуынша, осы жағдайдан кейін тағы бірнеше рет түсік тастаған.

“Осылай артынан алты рет түсік тастадым. Ол кезде студент едік. Таныс бір әйел “алты ай немесе бір жыл демалу керек” деп кеңес берді. Содан кейін Аянды дүниеге әкелдім. Кейін тағы үш рет түсік тастадым. Барлығы тоғыз рет құрсақ жоғалттым”, – деді продюсер.