Түркістан облысында кәсіпкерлік пен өндіріс саласын дамыту бағытындағы жұмыстар жаңа кезеңге қадам басты. Өңірде шағын және орта бизнесті қолдау, өндірістік инфрақұрылымды жетілдіру, инвестиция тарту және өңдеуші өнеркәсіпті дамыту бойынша жүйелі жұмыстар жүргізіліп келеді. Бұл мәселелер облыс әкімі Нұралхан Көшеровтің төрағалығымен өткен аппараттық мәжілісте жан-жақты қаралып, алдағы міндеттер нақтыланды.

Бүгінде Түркістан облысы кәсіпкерлік белсенділігі жоғары өңірлердің қатарында. Қазіргі таңда облыста 200 мыңнан астам шағын және орта кәсіпкерлік субъектісі жұмыс істейді. Бұл көрсеткіш бойынша өңір республикада Алматы мен Астана қалаларынан кейінгі үшінші орынға көтерілді. Соңғы жылдары кәсіпкерлік саласының қарқынды дамуы өңір экономикасының құрылымын өзгертіп, халықты жұмыспен қамтуға және бюджет кірісін арттыруға оң әсерін тигізіп отыр.

Облыста сауда, қызмет көрсету, өндіріс, ауыл шаруашылығы және өңдеу өнеркәсібі бағыттарында жаңа кәсіпорындар саны көбейіп келеді. Соның нәтижесінде сауда саласының нақты көлем индексі 119,7 пайызға жетіп, Түркістан облысы республикадағы ең жоғары көрсеткішке қол жеткізген өңірлердің қатарына енді.

Өңірде кәсіпкерлік бастамаларды қолдау мақсатында арнайы сүйемелдеу жүйесі қалыптасқан. Қазіргі таңда «Түркістан» кәсіпкерлерге қызмет көрсету орталығы арқылы жалпы құны 58,5 миллиард теңгені құрайтын 377 инвестициялық және кәсіпкерлік жоба сүйемелденіп жатыр. Бұл жобалар толық іске қосылған жағдайда үш мыңнан астам жаңа жұмыс орны құрылып, жергілікті халықтың тұрақты табыс көзін арттыруға мүмкіндік береді.

Жыл басынан бері аталған жобалардың 78-і іске қосылып үлгерді. Нәтижесінде өңір экономикасына 9,5 миллиард теңге көлемінде инвестиция тартылып, жүздеген азамат тұрақты жұмыспен қамтылды. Іске асқан жобалардың қатарында тұрмыстық химия өнімдерін шығару, сабын өндірісі, пластик ыдыстар дайындау, балық өңдеу кәсіпорындары, ауыл шаруашылығы техникасына қажетті қосалқы бөлшектер шығару, жиһаз жасау, мақта өңдеу және құрылыс материалдарын өндіру жобалары бар. Сонымен қатар денсаулық сақтау саласына бағытталған бірқатар жеке инвестициялық жобалар да жүзеге асырылып жатыр.

Мемлекет басшысы Қасым-Жомарт Тоқаев алға қойған Жаңа өнеркәсіптік саясат аясында Түркістан облысында өңдеуші өнеркәсіпті дамытуға ерекше басымдық берілуде. Басты мақсат – шикізат өндіруге тәуелділікті азайтып, қосылған құны жоғары дайын өнім шығаратын өндірістерді көбейту. Бұл бағытта облыста жаңа өндіріс орындарын ашу, технологиялық жаңғырту жұмыстарын жүргізу және импортты алмастыратын кәсіпорындарды дамыту бойынша нақты жобалар қолға алынған.

Соңғы жылдары өңірде өнеркәсіптің өңдеуші секторына тартылған инвестиция көлемі айтарлықтай артты. Жеңіл өнеркәсіп, құрылыс индустриясы, тамақ өнеркәсібі, химия өндірісі және машина жасау бағыттарында жаңа кәсіпорындар іске қосылып жатыр. Әсіресе жергілікті шикізатты терең өңдеу және өнімнің оқшаулау деңгейін арттыру мәселесіне ерекше назар аударылуда.

Мемлекет басшысы бірнеше рет атап өткендей, еліміздің берік өнеркәсіптік қалқанын қалыптастыру үшін өңдеуші секторды күшейту аса маңызды. Осыған байланысты Түркістан облысында ішкі нарықтың қажеттілігін қамтамасыз ететін және экспортқа бағытталған өндірістерді дамытуға басымдық берілуде. Облыс аумағында құрылыс материалдары, тұрмыстық химия, ауыл шаруашылығы өнімдерін қайта өңдеу, жиһаз және жеңіл өнеркәсіп өнімдерін өндіру бағытындағы кәсіпорындардың саны артып келеді.

Кәсіпкерлерді қаржылай қолдау бағытында да маңызды жұмыстар атқарылуда. Биыл өңірде «Өрлеу» және «Іскер аймақ» бағдарламалары арқылы жалпы көлемі 85 миллиард теңгеге дейін жеңілдетілген несие беру көзделген. Бүгінгі таңда «Өрлеу» бағдарламасы аясында ондаған жоба қаржыландырылып, кәсіпкерлерге миллиардтаған теңге көлемінде қолдау көрсетілді. Ал «Іскер аймақ» бағдарламасы арқылы өндірістік және қызмет көрсету салаларындағы жобаларға қаржы бөлінуде.

Ауылдық жерлердегі кәсіпкерлікті дамыту мақсатында жүзеге асырылып жатқан «Ауыл аманаты» бағдарламасы да оң нәтиже беріп келеді. Бағдарлама аясында жүзден астам жоба сүйемелденіп, ондаған кәсіпкер қаржылай қолдауға ие болды. Соның нәтижесінде қымыз өндіру, аяқ киім тігу, табиғи шырын шығару, балық өңдеу, ет өнімдерін дайындау және мақта өңдеу бағытындағы шағын өндірістер іске қосылды.

Өңірде индустриялық-инновациялық даму бағдарламасы аясында өндірістік инфрақұрылым құру жұмыстары да қарқынды жүргізілуде. Қазіргі таңда облыс аумағында 29 шағын өндірістік парк құрылып, кәсіпкерлерге дайын инфрақұрылымы бар өндірістік алаңдар ұсынылуда. Бұл алаңдар жаңа кәсіпорындардың тез іске қосылуына және өндіріс шығындарының төмендеуіне мүмкіндік беріп отыр.

Өндірістік аймақтарда жалпы саны 275 өндірістік нысанның құрылысы басталған. Оның ішінде 141 ғимарат пайдалануға берілді. Жалпы құны 226,9 миллиард теңгені құрайтын 269 жобадан тұратын инвестициялық пул қалыптастырылған. Қазіргі таңда олардың 78-і толық іске қосылып, нақты өнім өндіру кезеңіне өтті.

Бұл жобалардың қатарында жиһаз өндірісі, металл өңдеу, құрылыс материалдарын шығару, азық-түлік өндірісі, жеңіл өнеркәсіп, химия өнеркәсібі және агроөнеркәсіптік кешенге бағытталған кәсіпорындар бар. Алдағы кезеңде ақылды есептегіш құрылғылар, күн панельдеріне қажетті бөлшектер, пластикалық құбырлар, тұрмыстық химия өнімдері және құрылыс индустриясына арналған өнімдер шығаратын жаңа өндірістер іске қосылады деп жоспарлануда.

Түркістан облысында жүргізіліп жатқан индустриялық саясаттың негізгі мақсаты – шикізаттық бағыттан дайын өнім өндіруге көшу, технологиялық өндірістердің үлесін арттыру және жоғары оқшаулау деңгейіне қол жеткізу. Бұл өз кезегінде импорт көлемін азайтып, отандық өндірістің бәсекеге қабілеттілігін күшейтуге мүмкіндік береді.

Сарапшылардың пікірінше, соңғы жылдары өңірде қалыптасқан инвестициялық белсенділік пен өндірістік инфрақұрылымның дамуы Түркістан облысын еліміздің оңтүстігіндегі маңызды индустриялық орталықтардың біріне айналдыруға мүмкіндік береді. Жаңа кәсіпорындардың ашылуы еңбек нарығын жандандырып қана қоймай, өңірдің экспорттық әлеуетін күшейтіп, жергілікті бюджет түсімдерінің өсуіне де ықпал етеді.

Аппараттық мәжіліс барысында облыс әкімі Нұралхан Көшеров жауапты басқармалар мен аудан-қала әкімдеріне кәсіпкерлікті қолдау шараларын күшейтуді, өндірістік жобаларды белгіленген мерзімде іске қосуды, инвестиция тарту қарқынын төмендетпеуді және жергілікті тауар өндірушілердің үлесін арттыруды тапсырды. Сонымен қатар өңдеуші өнеркәсіпті дамыту, жоғары технологиялық өндірістер ашу және жаңа индустриялық жобаларды іске асыру бағытындағы жұмыстар тұрақты бақылауда болатыны атап өтілді.

Жалпы алғанда, Түркістан облысында кәсіпкерлік пен өнеркәсіпті дамытуға бағытталған жұмыстар өңір экономикасының жаңа сапалық деңгейге көтерілуіне негіз қалап отыр. Мемлекеттік қолдау, инвестициялық белсенділік және индустриялық-инновациялық саясаттың үйлесімді жүзеге асуы алдағы жылдары облыстың өндірістік әлеуетін одан әрі күшейтіп, тұрақты экономикалық өсімнің маңызды факторына айналмақ.