Көршілес жатқан Қазақстан мен Өзбекстан арасындағы стратегиялық әріптестік, іскерлік байланыстар күн санап тереңдеп келеді. Осы байланыстың жарқын үлгісінің бірі – Түркістан облысы, Мақтаарал ауданында жүзеге асырыла бастаған «Орталық Азия» халықаралық өндірістік кооперация орталығы (ХӨКО) болып отыр.

Екі ел басшылары Қасым-Жомарт Тоқаев пен Шавкат Мирзиёевтің жүйелі түрде жүргізіп отырған достық әрі прагматикалық саясаты арқасында, шекара маңындағы өңірлерде сауда-экономикалық, логистикалық және өндірістік бағыттағы жобалар сәтті жүзеге асып келеді. Соңғы жылдары Өзбекстан тарапынан Түркістан облысына тартылып жатқан инвестиция көлемі де айтарлықтай артты. Бұл екі ел арасындағы сенімді әріптестіктің нақты нәтижесі.

Мақтаарал ауданындағы «Атамекен» кедендік бекетінің іргесінен бой көтеретін халықаралық кооперация орталығы осы серіктестікті одан әрі тереңдетуге арналған ірі жобалардың бірі. Аталған орталықтың инфрақұрылымын тарту жұмыстары ресми түрде басталып, бұл тарихи бастама жаңа кезеңнің бастамасы ретінде бағаланып отыр. Құрылыс алаңында өткен арнайы басқосуға Түркістан облысы энергетика және тұрғын үй-коммуналдық шаруашылық басқармасының басшысы Тоқтар Усубалиев, облыстық құрылыс басқармасы басшысының орынбасары Байдулла Оразбеков, Мақтаарал ауданы әкімінің орынбасары Бижан Анарбеков, мердігер мекемелер мен жауапты бөлім басшылары қатысты.

Жиын барысында кооперациялық орталықтың аумағына қажетті барлық инженерлік инфрақұрылымды – автомобиль және темір жол желілерін, электр энергиясын, табиғи газды, ауыз су және кәріз жүйелерін, сондай-ақ телекоммуникация мен интернет байланысын тартуға қатысты жобалық-сметалық құжаттар егжей-тегжейлі сараланды. Сала мамандары мен жобалаушы ұйым өкілдері әр инфрақұрылым желісі бойынша техникалық шешімдер мен олардың іске асу мерзімдерін талдап, тиімді тәсілдерді ортаға салды.

Мамандар инфрақұрылым желілерінің сапасына, қауіпсіздігіне, өткізу қабілетіне және ұзақ мерзімді жарамдылығына ерекше назар аударды. Сондай-ақ, құрылыс барысында қолданылатын материалдардың стандарттарға сәйкестігі, экологиялық талаптарды сақтау, шекаралық аймақтың климаттық және логистикалық ерекшеліктері де кеңінен ескерілді. Бұл орталықтың тиімді жұмыс істеуі үшін инфрақұрылым тек қазіргі қажеттіліктерге емес, болашақтағы ауқымды өндірістік және көлік ағындарын ескере отырып жобаланған.

Басқосу кезінде жоба аясында энергия үнемдейтін технологиялар мен инновациялық шешімдерді енгізу мәселелері де қозғалды. Жобалаушылар ұсынған техникалық схемалар талқыланып, бірнеше инженерлік түйткілдерге нақты шешімдер қабылданды. Мәселен, телекоммуникациялық жүйелерді тартуда жоғары өткізу қабілетті, 5G-ready инфрақұрылымға бағытталған жобалар ұсынылды.

Халықаралық кооперация орталығы – тек өндіріс пен сауданы ғана емес, екі ел арасындағы мәдени және әлеуметтік байланыстарды да дамытатын маңызды алаңға айналмақ. Қазақстан мен Өзбекстан арасындағы өндірістік кооперацияның осындай нысандар арқылы жүзеге асуы – экономикалардың өзара толықтырылуын, еңбек бөлінісін, және өңірлік тұрақтылықты қамтамасыз етудің озық үлгісі.

Басқосу қорытындысы бойынша инфрақұрылым тарту жұмыстарының әр кезеңіне жауапты мердігер ұйымдар мен тиісті мемлекеттік органдарға нақты міндеттер жүктеліп, үйлесімді жұмыс жүргізу қажеттігі атап өтілді. Бұл – тек инженерлік құрылыс емес, сонымен қатар Орталық Азиядағы өңіраралық байланыстардың нығаюына, жаңа жұмыс орындарының құрылуына, инвестициялық ахуалдың жақсаруына ықпал ететін ауқымды бастама. Жоба сәтті жүзеге асқанда, Мақтаарал ауданы ғана емес, Түркістан облысы мен бүкіл Қазақстан экономикасы үшін тиімділік береді деп күтілуде.