Түркістан облысында қоғамдық қауіпсіздікті қамтамасыз ету, құқық бұзушылықтардың алдын алу және жол қозғалысы қауіпсіздігін арттыру бағытындағы жұмыстар Қазақстан Республикасының «Қауіпсіз ел» ұлттық жобасы аясында жүйелі түрде жүзеге асырылуда. Бұл бағытта Жедел басқару орталығының цифрлық мүмкіндіктері кеңінен қолданылып, өңірдегі құқықтық тәртіпті бақылау тиімділігі артып келеді.

Жоба аясында бейнебақылау жүйелері мен автоматтандырылған бақылау құралдары құқық бұзушылықтарды жедел анықтаудың негізгі тетігіне айналған. Мәселен, Сайрам ауданы көшелерінің бірінде бейнебақылау камералары арқылы Hyundai Accent автокөлігінің жүргізушісі жаяу жүргіншілер өткелінде жаяу жүргіншіге жол бермегені анықталды. Аталған құқық бұзушылық бойынша жүргізушіге қатысты әкімшілік шара қолданылды.

Қазіргі таңда Сайрам ауданы аумағында қоғамдық қауіпсіздікті қамтамасыз ету мақсатында 116 бейнебақылау камерасы және 8 жылдамдық өлшегіш камерасы тәулік бойы жұмыс істейді. Бұл құрылғылар жол қозғалысын бақылауға, құқық бұзушылықтардың алдын алуға және оқиғаларға жедел әрекет етуге мүмкіндік беріп отыр.

Жедел басқару орталығының мәліметіне сәйкес, аталған техникалық жүйелердің көмегімен бір тәуліктің өзінде 30-ға жуық әкімшілік құқық бұзушылық анықталған. Ал жыл басынан бері орталық арқылы мыңдаған құқық бұзушылық тіркеліп, олардың әрқайсысы бойынша заң аясында тиісті әкімшілік шаралар қабылданған.

«Қауіпсіз ел» ұлттық жобасының негізгі мақсаты – заманауи технологияларды енгізу арқылы азаматтардың қауіпсіздігін арттыру, құқық бұзушылықтардың алдын алу және қоғамда заң мен тәртіпті нығайту болып табылады. Осы мақсатта Түркістан облысында цифрлық мониторинг жүйелері кезең-кезеңімен кеңейтіліп, жол-көлік оқиғаларын азайтуға бағытталған кешенді шаралар жүзеге асырылуда.

Мамандардың айтуынша, бейнебақылау камералары мен автоматтандырылған жүйелер құқық бұзушылықтардың алдын алуда ғана емес, сонымен қатар жүргізушілер мен жаяу жүргіншілердің жауапкершілігін арттыруға ықпал етеді. Бұл өз кезегінде жолдағы қауіпсіздік мәдениетін қалыптастыруға және адам өмірі мен денсаулығын қорғауға мүмкіндік береді.

Түркістан облысы Полиция департаменті азаматтарды жол қозғалысы ережелерін қатаң сақтауға, жаяу жүргіншілерге жол беруге және белгіленген жылдамдық режимін бұзбауға шақырады. Құқық қорғау органдары «Қауіпсіз ел» ұлттық жобасы аясындағы жұмыстарды алдағы уақытта да жалғастырып, өңірдегі қоғамдық қауіпсіздік деңгейін одан әрі арттыруды көздейді.