Шымкент қаласының тұрғындары үшін қоғамдық қауіпсіздікті қамтамасыз ету – полиция жұмысының басым бағыттарының бірі. Әсіресе мерекелік күндері пиротехникалық бұйымдарды пайдалану мәселесіне айрықша мән беріледі. Өйткені қауіпсіздік талаптары сақталмаған жағдайда, көз тартарлық отшашудың арты қайғылы жағдайға ұласуы мүмкін.

Осыған байланысты Шымкент қаласының Полиция департаменті пиротехникалық өнімдерді сатып алу және пайдалану кезінде заң талаптарын қатаң сақтауға шақырады. Мамандардың айтуынша, пиротехникалық бұйымдарды тек арнайы рұқсаты бар сауда орындарынан сатып алу қажет. Сатып алынатын өнімнің міндетті түрде тиісті сертификаты болуы керек. Өнімнің сапасы мен жарамдылық мерзіміне, қаптамасының бүтіндігіне және пайдалану жөніндегі нұсқаулықтың болуына да назар аударған жөн.

Қала аумағында жүргізілген рейдтік іс-шаралар барысында пиротехникалық бұйымдарды заңсыз сатудың бірқатар дерегі анықталды. Нәтижесінде 2 мыңға жуық пиротехникалық өнім тәркіленіп, 102 құқық бұзушы әкімшілік жауапкершілікке тартылды. 

Пиротехникалық бұйымдарды белгіленбеген орындарда қолдануға да тыйым салынады. Әсіресе тұрғын үйлердің аулаларында, ғимараттарға жақын аумақта, адамдар көп жиналатын орындарда және қауіпсіздік талаптары сақталмайтын жерлерде пиротехника қолдану үлкен қауіп төндіреді. Оның салдарынан өрт шығуы, адамдардың жарақат алуы немесе мүлікке зиян келуі ықтимал. Егер пиротехникалық бұйымды пайдалану нәтижесінде адамға зиян келтірілсе, қолданыстағы заңнамаға сәйкес қылмыстық жауапкершілік те қарастырылуы мүмкін.

Қауіпсіздік – тек полицияның емес, әр азаматтың ортақ жауапкершілігі. Сондықтан тұрғындар пиротехникалық өнімдерді таңдағанда ең алдымен оның заңдылығы мен қауіпсіздігіне мән бергені жөн. Әсіресе балалардың пиротехникалық бұйымдарды өз бетінше пайдалануына жол бермеу қажет.

Шымкент қаласының Полиция департаменті қоғамдық қауіпсіздікті қамтамасыз ету, заңсыз пиротехникалық өнімдердің айналымына тосқауыл қою және азаматтардың құқықтарын қорғау бағытындағы жұмыстарды тұрақты түрде жалғастыруда.

Жарқыраған отшашу қуаныш сыйлауы мүмкін. Алайда сол қуаныш қауіпке айналмауы үшін заң талаптарын сақтап, тек қауіпсіз әрі сертификатталған өнімді пайдалану – әр азаматтың жауапкершілігі.