Қоғамдық қауіпсіздікті қамтамасыз ету және азаматтардың өмірі мен денсаулығын қорғау – «Қауіпсіз қоғам» жобасының басты басымдықтарының бірі. Әсіресе мереке күндері пиротехникалық бұйымдарды бақылаусыз пайдалану түрлі жазатайым оқиғаларға, өрттің шығуына және адамдардың жарақат алуына себеп болуы мүмкін. Сондықтан Шымкент қаласы Полиция департаменті тұрғындарды заң талаптарын қатаң сақтауға және пиротехникалық өнімдерді тек заңды сауда орындарынан сатып алуға шақырады.

Мамандардың айтуынша, пиротехникалық бұйымдарды тек арнайы рұқсаты бар сауда орындарынан алған жөн. Сатып алынатын әрбір өнімнің сапасы мен қауіпсіздігін растайтын сертификаты болуы міндетті. Сертификатталмаған немесе заңсыз сатылатын өнімдер техникалық талаптарға сәйкес келмеуі мүмкін және оларды пайдалану адам өмірі мен денсаулығына елеулі қауіп төндіреді.

Осы бағытта жүргізілген рейдтік іс-шаралар барысында қала аумағында заңсыз пиротехникалық өнімдер сатылған орындар анықталды. Нәтижесінде екі мыңға жуық пиротехникалық бұйым тәркіленіп, заң талаптарын бұзған 102 азамат әкімшілік жауапкершілікке тартылды. Бұл көрсеткіштер заңсыз саудаға тосқауыл қою және тұрғындардың қауіпсіздігін қамтамасыз ету бағытындағы бақылау жұмыстарының тұрақты түрде жүргізіліп жатқанын көрсетеді.

Полиция қызметкерлері пиротехникалық бұйымдарды белгіленбеген орындарда пайдалануға заңмен тыйым салынғанын ескертеді. Қауіпсіздік талаптарын сақтамай қолданылған пиротехникалық заттар ауыр жарақаттарға, тұрғын үйлер мен көліктердің өртенуіне, сондай-ақ қоғамдық тәртіптің бұзылуына әкелуі мүмкін. Егер мұндай әрекеттердің салдарынан адамның денсаулығына зиян келтірілсе немесе өзге де ауыр зардаптар орын алса, кінәлі тұлғаларға қылмыстық жауапкершілік қарастырылған.

Шымкент қаласы Полиция департаменті тұрғындарды өз қауіпсіздігі мен жақындарының амандығына бейжай қарамауға шақырады. Заң талаптарын сақтау, сертификатталған өнімдерді ғана пайдалану және пиротехниканы тек арнайы белгіленген тәртіппен қолдану – қауіпсіз мерекенің басты кепілі. «Қауіпсіз қоғам» жобасы аясында қоғамдық тәртіпті сақтау, заңсыз сауданың жолын кесу және азаматтардың құқықтық мәдениетін арттыру бағытындағы профилактикалық жұмыстар алдағы уақытта да жүйелі түрде жалғасатын болады.