Шымкент қаласында «Заң мен тәртіп» қағидаты аясында кәмелетке толмағандар арасындағы құқықбұзушылықтың алдын алу және ата-аналардың бала тәрбиесіндегі жауапкершілігін арттыру бағытында профилактикалық кездесулер өтті.

Шымкент қаласының білім басқармасының ұйымдастыруымен №1 Оқушылар сарайында және №87, №140, №72, №24 мектептерінде өткен жиындарға қалалық прокуратура мен Абай, Әл-Фараби, Еңбекші, Қаратау және Тұран аудандары прокуратураларының өкілдері қатысты. Кездесулерде отбасының бала тәрбиесіндегі рөлі, жасөспірімдердің қауіпсіздігі және құқықбұзушылыққа әкелетін жағдайлардың алдын алу мәселелері сөз болды.

Талқылау барысында кәмелетке толмағандар арасындағы құқықбұзушылықтың себептері, ата-ананың міндеттері мен жауапкершілігіне ерекше назар аударылды. Мамандар бала тәрбиесі тек мектептің міндеті емес екенін, жасөспірімнің мінез-құлқы мен ортаға бейімделуіне отбасындағы қарым-қатынастың да әсер ететінін түсіндірді.

Ата-аналарға балалардың бос уақытын тиімді ұйымдастыру, олардың кіммен араласатынын, қандай ортада уақыт өткізетінін және мінез-құлқындағы өзгерістерді назардан тыс қалдырмау жөнінде ұсыныстар берілді. Сонымен қатар мектеппен тұрақты байланыс орнатып, баланың оқуына ғана емес, күнделікті көңіл күйі мен мәселелеріне де көңіл бөлу қажеттігі айтылды.

«Заң мен тәртіп» қағидаты қоғамдағы құқықтық мәдениетті нығайтуды және заң талаптарын сақтауды көздейді. Бұл ретте жасөспірімдерге заңды құрметтеуді үйретумен қатар, олардың құқықбұзушылыққа баруына ықпал ететін себептерді ерте анықтау маңызды. Ата-ананың баламен ашық сөйлесуі, оның мәселесін дер кезінде байқап, мектеппен бірлесіп әрекет етуі келеңсіз жағдайлардың алдын алуға көмектеседі.

Бала тәрбиесіндегі ортақ жауапкершілік отбасы мен білім беру ұйымдарының өзара ынтымақтастығын талап етеді. Сондықтан ата-аналармен жүргізілетін профилактикалық кездесулер құқықтық түсіндірумен қатар, балалардың қауіпсіз ортасын қалыптастыруға және жасөспірімдердің тәртібіне қатысты мәселелерді бірлесіп шешуге бағытталған.