Флорида штатында Palm Beach International Airport атауын АҚШ президенті  Дональд Трамптың құрметіне өзгерту туралы заң жобасы мақұлданды, деп хабарлайды АЗЕРТАДЖ.

Штаттың заң шығару жиналысы құжатты қабылдады. Енді оған губернатор Рон Десантис қол қоюы тиіс. Заң жобасына сәйкес әуежай «Президент Дональд Дж. Трамп атындағы халықаралық әуежай» деп аталатын болады.

Құжатты алдымен Өкілдер палатасы мақұлдап, кейін Флорида Сенаты қабылдаған. Республикашылдар екі палатада да айтарлықтай басымдыққа ие. Республикашыл сенатор  Дэнни Берджесстің айтуынша, болашақта бұл шешім Трамптың «Американы құтқару жолындағы еңбегін мойындау» ретінде бағаланатын болады.

Губернатор Десантис әзірге заң жобасына қол қою-қоймауы жөнінде ресми мәлімдеме жасаған жоқ. Айта кетейік, 2024 жылғы республикашыл праймериз кезінде Трамп Десантисті қатаң сынға алған еді, алайда кейін губернатор оның кандидатурасын қолдаған.

Палм-Бич халықаралық әуежайы Трамптың жеке клубы — Mar-a-Lago маңында орналасқан. АҚШ президенті бұл әуежайды жиі пайдаланып, оған Air Force One ұшағымен қатынайды.

Құжатқа қол қойылған жағдайда әуежай атауы ресми түрде өзгертіледі.