Шымкент қаласында 28-30 шілде аралығында жолаушылар тасымалы саласындағы заңдылықты қамтамасыз етуге бағытталған республикалық «Тасымалдаушы» жедел-профилактикалық іс-шарасы өтуде. Оның негізгі мақсаты – жолаушылар тасымалымен айналысатын жүргізушілердің заң талаптарын сақтауын бақылау, көлік құралдарының техникалық жағдайын тексеру және жол қозғалысы қауіпсіздігін арттыру.

Іс-шара барысында полиция қызметкерлері жолаушылар тасымалын жүзеге асыратын көлік құралдарын тексеріп, жүргізушілердің жол қозғалысы ережелерін сақтауына ерекше назар аударуда. Бұл – күн сайын қоғамдық көлік пен такси қызметін пайдаланатын мыңдаған тұрғынның қауіпсіздігін қамтамасыз етуге бағытталған маңызды профилактикалық жұмыс.

Республикалық іс-шараның алғашқы тәулігінде Шымкент қаласында 543 әкімшілік құқық бұзушылық анықталды. Оның ішінде жолаушылар тасымалы саласындағы талаптарды бұзудың бірқатар дерегі тіркелген.

Атап айтқанда, заңсыз такси қызметін ұсынудың 72 фактісі анықталса, жолаушыларды тасымалдау қағидаларын бұзудың 68 дерегі тіркелді. Сонымен қатар қауіпсіздік белдігін пайдаланбаған 47 жүргізуші анықталған. Техникалық талаптарға сәйкес келмейтін көлік құралдарын пайдаланудың 32 фактісі де белгілі болды.

Бұдан бөлек, тәртіп сақшылары жол қозғалысы қауіпсіздігі мен жолаушылар тасымалы саласындағы заң талаптарын бұзудың өзге де деректерін анықтап, олар бойынша қолданыстағы заңнамаға сәйкес тиісті шаралар қабылдауда.

Жолаушы тасымалы – үлкен жауапкершілікті талап ететін сала. Себебі жүргізушінің әрбір әрекеті ондаған адамның өмірі мен денсаулығына тікелей әсер етуі мүмкін. Сондықтан көліктің техникалық жарамдылығы, жүргізушінің тәртібі, жолаушыларды белгіленген талаптарға сай тасымалдау және қауіпсіздік белдігін пайдалану секілді қарапайым талаптардың өзі аса маңызды.

Шымкент қаласының Полиция департаменті жолаушылар тасымалы саласындағы заңдылықты қамтамасыз ету және жол қауіпсіздігін арттыру бағытындағы профилактикалық жұмыстар тұрақты түрде жүргізілетінін еске салады.

Жолдағы тәртіп – ортақ жауапкершілік. Заң талаптарын сақтау арқылы әр жүргізуші өз өмірін ғана емес, жолаушылар мен жол қозғалысына қатысушылардың қауіпсіздігін де қорғайды.