Қырғызстан Ұлттық қауіпсіздік жөніндегі мемлекеттік комитетінің (ГКНБ) бұрынғы төрағасы Камчыбек Ташиев Қырғызстанға оралды, деп хабарлайды Tengrinews.kz 24.kg-ке сілтеме жасап. Мәліметке сәйкес, бұрынғы арнайы қызмет басшысы 13 ақпанға қараған түні «Манас» халықаралық әуежайына келген. БАҚ өкілдерінің хабарлауынша, Камчыбек Ташиев бірден көлікке отырып, әуежайдан кетіп қалған, журналистердің сұрақтарына жауап беруге мүмкіндік болмаған.

Бұған дейін Ташиевтің жақтастары саясаткердің емі әлі аяқталмағанына қарамастан, Қырғызстанға оралу туралы шешім қабылдағанын хабарлаған.

10 ақпанда Камчыбек Ташиевтің Министрлер кабинеті төрағасының орынбасары – Қырғызстан Ұлттық қауіпсіздік мемлекеттік комитетінің төрағасы қызметінен босатылғаны белгілі болды. Тиісті жарлыққа Қырғыз Республикасының президенті Садыр Жапаров қол қойған.

Қырғызстан президентінің баспасөз қызметінің хабарлауынша, Садыр Жапаров бұл қадамның негізгі мақсаты – мемлекет бірлігін нығайту және қоғамда, соның ішінде мемлекеттік құрылымдар арасында жікке бөлінудің алдын алу екенін атап өткен.

Алайда кейінірек президенттің баспасөз хатшысы шиеленісті Камчыбек Ташиевтің өзі емес, оның жақын айналасындағы адамдар туындатқанын нақтылады. Олардың депутаттарға қоңырау шалып, «генералдың жағына шығуға» және «президенттің жаңа сайлауын бастамашылық етуге» үгіттегені айтылды.

Камчыбек Ташиевтің өзі бұған дейін жасалған операциядан кейін тексеруден өту үшін шетелге президенттің рұқсатымен шыққанын мәлімдеді. Оның айтуынша, қызметінен босатылу туралы шешім ол үшін күтпеген жағдай болған. Сонымен қатар Ташиев кез келген жағдайда мемлекет басшысының шешімін орындау қажет екенін атап өтті.