Қаңтар оқиғасы кезінде 4 жасар Айкөркемнің өліміне қатысты іс

Oinet.kz 25-07-2023 662

Алматыда қаңтар оқиғасы кезінде қаза болған 4 жасар Айкөркем Мелдеханның өліміне қатысты іс бойынша прокурорлар мәлімдеме жасады, деп хабарлайды Oinet.kz тілшісі Stan.kz ақпарат агенттігіне сілтеме жасап.

Screenshot_8.jpg

Ведомствоның баспасөз қызметі хабарлағандай, айыптау орнында әскери қызметші А.И.Жұман бар. Оған Қылмыстық кодекстің 451-бабының 2-бөлігінің 1-тармағы "Кәмелетке толмаған баланың өліміне әкеп соқтырған қаруды қолданып билігін асыра пайдалану" бойынша айып тағылуда. Басты сот отырысы 26 шілдеге белгіленген.

"Алматы гарнизоны әскери соты қылмыстық істі қарауға кірісті. Іс материалдарында жария етуге жатпайтын құпия құжаттардың болуына байланысты процесс жабық режимде өтіп жатыр. Қорғаушы тарапқа да, жәбірленушілерге де тиісті заң көмегі көрсетілген, олардың адвокаттары бар.

Қылмыстық процеске қатысушылардың өтініші бойынша мемлекеттік құпияларға рұқсат берілді. Марқұмның әкесі Айдос Мелдеханға мұндай рұқсат беру туралы бірнеше рет ұсыныс жасалғанымен, ол рұқсат беруден бас тартты. Оған бас тартудың салдары туралы ескертілді", – деп хабарлады Бас әскери прокуратура.

Айта кетейік, бұған дейін БАҚ 14 шілдеде алдын ала тыңдау кезінде Айкөркем Мелдеханның әкесі мен әпкесі сотқа жіберілмеді деп хабарлаған болатын.

"Айыптаушы тарап қатаң түрде қылмыстық іс материалдарына: куәлардың айғақтарына, сарапшылардың қорытындыларына және А.И.Жұманның әрекетінің заңсыздығын растайтын басқа да дәлелдерге негізделеді. Қазіргі уақытта басты сот талқылауы тағайындалды, оның барысында барлық жиналған дәлелдемелер зерттеліп, бағаланады.

Сот талқылауының барысы туралы жұртшылыққа жария ету мүмкіндігіне қарай хабарланады. Осыған байланысты тек ресми ақпарат көздеріне сенуіңізді сұраймыз", – деп толықтырды прокуратура.

Қылмыстық істің қаралу барысы Бас әскери прокуратураның бақылауында екені хабарланды.

Еске салайық, 4 жасар Айкөркем Мелдехан өткен жылдың 7 қаңтарында Алматыда болған тәртіпсіздік кезінде қаза тапқан болатын. Қыз әкесі және үш әпкесі, ағасымен бірге Сейфуллин даңғылының бойымен келе жатқан көлікте болған. Сәтбаев көшесінің қиылысында көлікке оқ жаудырылып, салдарынан Айкөркем қаза тауып, оның 15 жасар әпкесі жараланған.

Әкім Әйтенов қызметінен кетпейді
Мұхтар Әблязовтың ағасы әрі сыбайласы өз еркімен елге оралды
Сәйкес тақырыптар
Көтерілу