Қазіргі таңда қаржылық сауаттылық – әр азаматқа қажет маңызды дағды. Интернеттің күнделікті өмірге дендеп енуімен бірге алаяқтықтың жаңа тәсілдері де көбейді. Жалған қоңыраулар, күмәнді инвестициялық ұсыныстар, қаржы пирамидалары мен заңсыз ойындарға тарту – азаматтардың қаржылық қауіпсіздігіне тікелей қатер.

Осы қауіптердің алдын алу мақсатында Шымкент қаласы бойынша Экономикалық тергеп-тексеру департаменті 2026 жылдың алғашқы алты айында интернет-алаяқтық, қаржы пирамидалары және лудоманияның алдын алуға бағытталған 47 профилактикалық іс-шара өткізді.

Жүргізілген жұмыстар аз уақыттың ішінде қомақты аудиторияны қамтыды. Атап айтқанда, түрлі түсіндіру кездесулері мен ақпараттық шаралар арқылы 36 мыңнан астам тұрғын қамтылды. Ал әлеуметтік желілерде жарияланған профилактикалық материалдардың жалпы қаралымы 4 миллионнан асты.

Бұл сандар бір қарағанда жай статистика болып көрінуі мүмкін. Алайда әрбір қаралымның артында алаяқтықтың құрбаны болудан сақтанған, қаржылық шешім қабылдауда мұқият бола түскен азамат тұруы ықтимал. Сондықтан профилактикалық жұмыстың басты нәтижесі – құқық бұзушылық орын алғаннан кейін әрекет ету емес, оның алдын алу.

Департамент мамандары жастармен, кәсіпкерлермен және аға буын өкілдерімен арнайы кездесулер өткізіп, қаржылық әрі құқықтық сауаттылықты арттыруға басымдық берді. Дәрістер, форумдар мен ашық кездесулер барысында қаржы пирамидаларының негізгі белгілері, интернеттегі алаяқтық схемалар және заңсыз ойындарға тәуелділіктің қауіпті салдары туралы ақпарат берілді.

Мамандардың айтуынша, күмәнді ұсыныстың басты белгілерінің бірі – қысқа уақытта жоғары табысқа кепілдік беру. «Ақшаңызды бірнеше есеге көбейтеміз», «тәуекелсіз инвестиция» деген уәделерге сын көзбен қарау қажет. Қаржылық шешім қабылдамас бұрын ақпараттың заңдылығын тексеру – әр азаматтың өз қауіпсіздігіне жасайтын қарапайым қадамы.

Өңірлік коммуникациялар қызметінде өткен брифингте Экономикалық тергеп-тексеру департаментінің басқарма басшысы, Экономикалық тергеу қызметінің полковнигі Дәурен Бөрібайұлы атқарылған жұмыстар туралы мәлімдеді. Жыл соңына дейін профилактикалық жұмыстар жалғасып, тұрғындардың қаржылық қауіпсіздік мәдениетін қалыптастыруға бағытталған жаңа жобалар жүзеге асырылмақ.