Түркістан облысында шағын және орта өнеркәсіптер дамып, өңір экономикасы айтарлықтай серпін алуда. Инвесторларға қолайлы жағдай жасалған.

Жуырда аймақ басшысы Нұралхан Көшеров Саурандағы «Шағын өнеркәсіптік парк» жобасын аралап, жаңа ғимарат құрылысымен танысты. Ол жауапты басшыларға және мердігерлерге мердігерлік және инженерлік жұмысты уақтылы әрі сапалы аяқтауды тапсырды. Сонымен қатар іске қосылған кәсіпорындардың жұмысымен танысып, өндірістің қарқынды өсуіне назар аударды.

«Жоба ұсынып, бірлесе жұмыс істеуге ниет білдіруші компаниялар көбеюде. Сондықтан браунфилдтер сапалы әрі уақтылы тапсырылуы тиіс. Өндірістік парктегі жұмыстар қатаң бақылауымда тұр. Жұмыс орындарын ашу, өңірдің өзіндік кірісін ұлғайту өте маңызды», – деді Нұралхан Көшеров.

Алғаш рет 100 гектар аумақты қамтыған парк І және ІІ кезеңдер аясында 152 өндірістік ғимарат салып, 308 млрд теңге инвестиция тарту және шамамен 6 000 жаңа жұмыс орнын ашуды мақсатқа қойған. Қазіргі таңда 11 жоба іске қосылып, 790 жұмыс орны құрылды. Биыл қосымша 29 ғимарат аяқталып, 26 жоба іске қосылады деп күтілуде. Осылайша тағы 1 950 жұмыс орны ашылып, 136,8 млрд теңге инвестиция тарту жоспарланған

Парк аумағында халықаралық «Жасыл суық Қазақстан» (UBC) компаниясының тоңазытқыш зауыты, қуаты – жылына 140 000 дана, 60 млн евро инвестициямен іске қосылған. Сонымен бірге жаңбырлатып және тамшылатып суару жүйелері, ауылшаруашылық тракторлар, сэндвич панельдер, жиһаз, медициналық жабдықтар, ішкі есіктер шығаратын цехтар да өз жұмысын бастады

Сонымен қатар, қытайлық “Avatar Agricultural Technology Development” компаниясы дрон шығаратын зауыт салуға кірісті. Болашақта тағы да сусыздандырылған көкөністер, электромагниттік шығын өлшегіштер, өнеркәсіптік су клапандары, кептірілген жемістер мен көкөністер өндіретін зауыттар іске қосылмақ

Бұл жобалардың табысты өсуі өңір экономикасын жылдам индустрияландыруға негіз болуда. Өнімнің көптүрлілігі мен экспорт әлеуеті артқан сайын облыстың өзіндік кірісі өсіп, жұмыссыздық деңгейі төмендеп келеді.

Қазіргі уақытта өңірде 19 индустриалды аймақ (2 443 гектар), 3 өнеркәсіптік парк және арнайы экономикалық аймақтар бар. Солардың ішінде биылғы мамырда 744 гектарға тараған 5 жаңа индустриалды аймақ ашылды — Жетісай (59 га), Отырар (85 га), Арыс (30 га), Қарамұрт (523,9 га) және Шардара‑2 (46,1 га). Бұл аймақтарда 129 млрд теңге көлеміндегі 84 жоба жоспарланған, оның 17-сі биыл іске қосылды, тартылған инвестициясы – 49,7 млрд теңге

Сонымен бірге Түркістан қаласы маңындағы «SPK Turkistan» индустриалдық паркінде 30 гектарға инженерлік инфрақұрылым тартылып, 29 инвестициялық жобаға 96,9 млрд теңге қарастырылған. Бүгінде олардың 8-і іске қосылып, 712 жаңа жұмыс орны ашылған

Бұл жобалар өңір экономикасына 196,5 млрд теңге инвестиция тартып, 2025–2028 жылдары жалпы инвестициялық көлемі 2,3 трлн теңге болатын 110 жобаны іске асыру жоспарланып, нәтижесінде 19 783 жұмыс орны құрылады деп күтілуде

Сонымен қатар, ауылшаруашылық техникасына бағытталған жобалар да қарқынды түрде іске қосылып жатыр. Мақтаарал ауданында 3 млрд теңгеге екі зауыт  (тамшылатып суаруға арналған техника және мақта тұқымын өңдеу бойынша) тұрғызылады. Бұл өнімдер Қытай, Түркия, Иран, Еуропа және Орталық Азия нарығына экспортталады

Қытайлық Xinjiang Lihua Group компаниясымен мақтаның элиталық сұрыптарын өсіру және тоқыма кластерін құру жөнінде келіссөздер жүргізілуде, бұл өңірдегі өндірістік алуан түрлілікті кеңейтеді

Осының бәрі – Түркістан облысын ұлттық өндіріс орталығына айналдырудағы стратегияның маңызды құрамдас бөлігі. Инфрақұрылымды дамытып, инвестициялық жобаларды жандандыру арқылы аймақтың экономикалық өсімі тұрақты түрде артқан. Бұл үрдіс жұмыс орындарын құрып, тұрғындардың табысын арттырып, аймақтың әлеуметтік-экономикалық тұрақтылығын нығайтуға бағытталған.