Шымкент қаласында халықтың экологиялық мәдениетін қалыптастыру және экологиялық жауапкершілік деңгейін арттыруға бағытталған «Таза Қазақстан» республикалық экологиялық бағдарламасы жалғасуда. Бағдарламаның негізгі бағыттарының бірі – қаланың білім беру мекемелерінде іс-шаралар ұйымдастыру.

Қаладағы мектептерде, колледждер мен жоғары оқу орындарында ашық экологиялық сабақтар, тәрбие сағаттары мен танымдық кездесулер өткізілуде. Аталған іс-шараларда жастарды қоршаған ортаны қорғау мәселелеріне тартуға ерекше көңіл бөлінуде.

Атап айтқанда, №50, 65 және 135 жалпы білім беретін мектептерде экология, тұрақты өмір салты және табиғатқа ұқыпты қарау тақырыптарына арналған ашық сабақтар ұйымдастырылды.

Сондай-ақ, қалалық Жастар ресурстық орталығында жастардың экологиялық мәдениетін арттыруға бағытталған кездесу өтті. Шараға эковолонтерлер, экология саласының мамандары мен үкіметтік емес ұйымдардың өкілдері қатысты. Кездесу барысында қатысушылар өзекті экологиялық мәселелерді талқылап, оларды шешу жолдарын ұсынды.

Іс-шараларға жастар ұйымдарының өкілдері, оқушылар мен қонақтар белсене қатысып, өз сөздерінде жас ұрпақты қоршаған ортаны қорғау мәселелеріне ерекше мән беруге және экологиялық жауапкершілігі жоғары қоғам құруға үлес қосуға шақырды.

Аталған шараларды ұйымдастыруға қаланың білім беру мекемелері, Жастар ресурстық орталығы және қоғамдық экологиялық ұйымдар атсалысты.

«Таза Қазақстан» бағдарламасының мақсаты – азаматтарды, әсіресе жастарды қалалық экологиялық бастамаларға белсенді қатыстыру, экологиялық таза әрі тұрақты өмір салтын насихаттау және қоғамда экологиялық сананы дамыту.

Сонымен қатар, бұл бастама елді мекендердің инфрақұрылымын жақсартуды, тұрмыстық қалдықтарды өңдеуді, жасыл аймақтарды көбейтуді көздейді. Қалалар мен ауылдардың көркеюі, саябақтар мен демалыс орындарының көбеюі – халықтың өмір сапасын арттырады. Таза орта – денсаулық кепілі, демек, қоғамның ұзақ мерзімді дамуына негіз болады.

«Таза Қазақстан» бағдарламасының тағы бір маңызды қыры – жас ұрпақты экологиялық тәрбиеге баулу. Табиғатты қорғаудың мәнін бала кезден ұғынған жас буын болашақта елдің нағыз жанашырына айналады. Бұл – тек бүгінгі күннің ғана емес, келешек ұрпақтың қамын ойлаған игі бастама.