Шымкент бүгінде Қазақстанның оңтүстігіндегі ең ірі өнеркәсіп орталықтарының біріне айналып келеді. Бұл қалада зауыттар бой көтеріп қана қоймай, әлемдік нарыққа “Made in Kazakhstan” деген жазуы бар сапалы өнімдер жол тартуда. 

Мұның бәрі – қала халқының еңбегі мен табандылығының, кәсіпкерлік рух пен жаңашылдықтың айқын нәтижесі.

Биылғы жылдың қаңтар-қыркүйек айларында Шымкент қаласындағы өнеркәсіп кәсіпорындары 1 триллион 80 миллиард теңгенің өнімін өндірді. Бұл өткен жылдың сәйкес кезеңімен салыстырғанда 15,7 пайызға жоғары көрсеткіш. Экономикалық белсенділік артып, өндіріс көлемінің өсуі нәтижесінде Шымкент республика өңірлері арасында төртінші орынға көтерілді. Сарапшылардың пікірінше, мұндай серпінді өсім қаланың инвестициялық ахуалының жақсаруымен және өндіріс саласына жасалып отырған жүйелі мемлекеттік қолдаумен тікелей байланысты.

Қаладағы өнеркәсіптің басты күші – өңдеу саласы. Бүгінде бұл бағыт жалпы өндіріс көлемінің 90 пайызын құрап отыр. Бұл көрсеткіш Шымкенттің экономикалық құрылымындағы маңызды өзгерістің айғағы. Яғни, қала енді тек шикізат емес, дайын өнім шығаратын орталыққа айналып келеді. 2025 жылдың тоғыз айында өңдеу саласында 968,6 миллиард теңгенің өнімі шығарылып, физикалық көлем индексі 117,6 пайызға жеткен.

Шымкент химия өнеркәсібі бойынша да серпінді дамуда. Биыл сала өнімінің көлемі екі жарым есеге артқан. Қаладағы жаңа зауыттар құрылыс қоспалары мен заманауи бояулар, тұрмыстық химия өнімдерін өндіруде. Бұл тек экономикалық табыс емес – импортты алмастыру, отандық брендтерді нығайту және сыртқы нарыққа шығу жолындағы маңызды қадам.

Шымкенттің өндіріс картасында тағы бір айрықша бағыт – сусын өндіру саласы. Мұнда да айтарлықтай өсім байқалады: өнім көлемі 2,4 есеге артқан. Жергілікті кәсіпорындар заманауи технологияларды енгізіп, тұтынушы талғамына сай сапалы өнім ұсынуда. Қаланың өз аумағында өндірілген минералды сулар мен шырындар бүгінде Қазақстанның басқа өңірлерінде де жоғары сұранысқа ие.

Өнеркәсіптің өрлеуі тек экономикалық көрсеткіштермен өлшенбейді. Бұл – мыңдаған жұмыс орнының ашылуы, тұрғындардың табысының артуы, жаңа мамандықтардың пайда болуы деген сөз. Әр зауыттың, әр цехтың артында қарапайым еңбек адамдарының маңдай тері, ізденісі мен қажырлы еңбегі жатыр.

Индустриялық аймақтар мен «Жұлдыз», «Оңтүстік» сияқты өндірістік алаңдарда ондаған жаңа жобалар жүзеге асып жатыр. Олардың қатарында құрылыс материалдары, тағам өнімдері, жиһаз және киім өндірісі бойынша кәсіпорындар бар. Қала әкімдігі мен инвесторлар арасындағы әріптестік нәтижесінде Шымкент өндірісінің географиясы кеңейіп, жаңа экспорттық бағыттар ашылуда.

Мамандардың айтуынша, алдағы жылдары Шымкент өнеркәсіп картасында жаңа технологиялық бағыттар – “жасыл экономика”, экологиялық өндіріс және инновациялық өнімдер саласы дами түседі. Бұл өз кезегінде қаланың инвестициялық тартымдылығын арттырып, жаңа кәсіпкерлердің көбеюіне жол ашады.

Бүгінде Шымкенттің экономикалық бет-бейнесі түбегейлі өзгеруде. Кеше ғана шағын цехтар мен өндіріс орындары бар қала болса, бүгінде ол еліміздің үшінші мегаполисі ретінде ірі зауыттар мен кәсіпорындардың шоғырланған орталығына айналды. Бұл – еңбек пен жауапкершіліктің, ынтымақ пен жаңашылдықтың жемісі.

Шымкент – бүгінде тек оңтүстіктің емес, тұтас Қазақстанның өндірістік жүрегі. Мұнда әрбір жұмысшы, әрбір кәсіпкер өз ісімен елдің экономикалық қуатын арттыруға үлес қосып отыр.