Құрылыс саласы – экономиканың негізгі тіректерінің бірі. Қазіргі таңда елімізде бұл сала қарқынды даму үстінде.

Құрылысшылардың қолтаңбасы әрбір бой көтерген тұрғын үйде, мектеп пен ауруханада, сондай-ақ инфрақұрылымдық нысандарда көрініс табуда. Осы мамандық иелерінің мерекесі жылда тамыз айында аталып өтіледі. Шымкент қаласының әкімі Ғабит Сыздықбеков құрылыс және жол саласы қызметкерлерін кәсіби мерекесі күні мегаполистің дамуына үлес қосып жүрген мамандарды құттықтады. Сөйтіп, өз ісінің жетік мамандарын Қазақстан Республикасы Президентінің атынан мемлекеттік наградалар – ІІІ дәрежелі «Еңбек даңқы» орденімен, «Ерен еңбегі үшін» медалімен марапаттап, үздік қызметкерлерге Алғыс хаттар табыс етті.

Қала басшысы сала мамандарының орасан еңбегіне тоқталып, қызметкерлердің жоғары кәсіби біліктілігін, жауапкершілігін атап өтті. Олардың күш-жігерінің арқасында қалада жаңа тұрғын үйлер, әлеуметтік және инфрақұрылымдық нысандар бой көтеруде. Бұл игілікті істер халықтың жайлы өмір сүруін қамтамасыз етуде. 

Құрылыс – экономика локомотиві. Мемлекет басшысы Қасым-Жомарт Тоқаев елімізде құрылыс саласын дамытуға, құрылысшылардың қарқынды еңбегін қамтамасыз етуге тұрақты назар аударып келеді. Соңғы жылдары Шымкент қаласында құрылыс жұмыстары қарыштап дамып келеді. Әдемі құрылыс өңірдің де ажарын аша түскен. Олардың қатарында елді мекендерге газ құбырларын тарту, ауыз су құбырларын жөндеу, әлеуметтік нысандар салу, олдарды жөндеу, көпқабатты тұрғын үйлерді қайта жаңғырту, сондай-ақ абаттандыру, көріктендіру жұмыстары бар.

Жалпы Шымкент қаласы республикалық маңызы бар қала мәртебесін алғаннан бері 4,5 миллион шаршы метрден астам тұрғын үй бой көтерді. Биылдың өзінде 1,37 миллион шаршы метр тұрғын үйді ел игілігіне тапсыру жоспарлануда. Өткен жылы «Жайлы мектеп» ұлттық жобасы аясында 11 жаңа мектеп пен 2 оқушылар сарайы пайдалануға берілген болатын. Сонымен қатар 17 білім беру нысаны мен бірқатар әлеуметтік ғимараттың құрылысы қарқынды жүргізілуде. 

Сондай-ақ жол-көлік инфрақұрылымын дамытуда да ауқымды жобалар іске асуда. Бүгінгі күні көлік-логистика инфрақұрылымының тиімділігін арттыруға баса көңіл бөлінуде. Ішкі өңірлік қатынастарды жақсарту үшін автожолдардың жергілікті желісін жөндеу мен қайта салу бағытындағы жұмыстар жылсанап жандана түскен. Жыл сайын орта есеппен 250 шақырым жол жөнделсе, биыл бұл көрсеткіш 1059 шақырымға жеткізілмек. 

Қоғамның ажырамас бөлшегі, құрылысшылар – болашақты қалаушы мамандық. Сондықтан бұл күні олардың ерен еңбегін ескеріп, ел дамуына қосып жатқан елеулі үлесі әрдайым бағаланады.