Шымкент қаласында Әдет-ғұрып және салт-дәстүр орталығы «Құрақ құрау – өнердің сарқылмас қайнар көзі» атты шеберлік сағатын ұйымдастырды.

Іс-шара аясында қатысушыларға құрақтың түрлері, оны құраудың қыр-сыры таныстырылып, қолөнер шеберлерінің еңбектері паш етілді.

Қазақтың дәстүрлі мәдениетінде құрақ – тек сәндік бұйым ғана емес. Ол – анадан балаға берілетін өнердің, шыдамдылық пен іскерліктің мектебі. Әжелеріміз құрақ құрау арқылы қыз балаға ұқыптылықты, сабырлықты, сұлулықты бағалауды үйреткен. Әр қиылған матаның өзіндік мәні болып, олардан құралған өрнек бір шаңырақтың тарихын, әулеттің шежіресін бейнелеген. Іс-шараның басты мақсаты да осы ұлттық қолөнерді насихаттап, жастардың ұлттық өнерге деген қызығушылығын арттыру, көркемдік талғамын дамыту және ата-баба мұрасын жаңғырту.

Іс-шара аясында «Аламан құрақ» жобасы үшінші рет жүзеге асып, ұлттық өнер жаңа белеске көтерілді. Алматы қаласындағы әйгілі Медеу мұз айдынында әлемдік рекорд орнату мақсатында еліміздің барлық аймағынан келген 660 шебер 660 көрпеше құрап, олар біртұтас ұлттық композицияға біріктірілді. Әр көрпенің ұзындығы – 230 см, ені – 90 см. Жалпы композицияның ауданы – 1366 шаршы метрді құрады.

Қазақ халқының бай рухани қазынасында қолөнер дәстүрлерінің алар орны ерекше. Соның ішінде құрақ құрау – ғасырлар қойнауынан жеткен өнер, ата-бабамыздың тұрмысында кеңінен қолданылған қолөнер түрі. Құрақ – әсемдік пен өрнектің ғана белгісі емес, ол ұрпақ сабақтастығын сақтап, халықтың тарихы мен тағылымынан сыр шертетін ұлттық мұра.

– Құрақ құрау – ұрпақ сабақтастығының алтын арқауы. Ұлттық өнерімізді дәріптеу – болашақ ұрпақ алдындағы басты міндетіміз. Құрақ – халқымыздың мәдени кодын сақтаған, тұрмыс-тіршілігі мен дүниетанымын айқындаған өнер. Біз бүгінгі ұрпаққа осы құндылықты жеткізіп, қызығушылығын арттыру арқылы ұмытылмас дәстүрді жаңғыртып отырмыз. Құрақ құрау арқылы біз жастарға тек әсемдікті ғана емес, шыдамдылық пен сабырлықты үйретеміз. Мұндай бастамалар халқымыздың мәдени коды мен дәстүрін сақтауға зор үлес қосатыны сөзсіз, – дейді Мөлдір Оңдасынова.

Қазақтың қолөнері – халықтың тұрмысын, дүниетанымын, рухани болмысын айқындайтын асыл қазына. Сол қазынаның бір тармағы болып саналатын құрақ құрау – ұрпақтар арасын жалғайтын алтын көпір. Әдет-ғұрып орталығы өткізген шеберлік сағаты да осы өнерді ұмыттырмай, қайта жандандыруға бағытталған қадам болып отыр. «Аламан құрақ» – халқымыздың ғасырлардан жеткен мұрасын жаңғыртуға арналған үлкен қадам. Біз ұлттық өнерімізді жаңаша сипатта танытып, оны халықаралық деңгейге шығаруды мақсат еттік. Ол мақсатымыз орындалды. Бұл  жоба мәдени мұрамызды сақтаудың ғана емес, оны әлемге паш етудің бірегей бастамасы. Осы құрақшылардың басын бір жерге қосып, олардың өнерін бір арнаға бұрсақ деген арман еді. Енді, міне, жоба бүгінде әлемдік деңгейге дейін көтеріліп кетті. Өте қуаныштымыз. Бұл ұлттық өнерге деген жанашырлық деп білеміз, - дейді жоба жетекшісі, бастамашы Нұргүл Абайхан. 

Шара барысында Шымкент қаласының мәдениет, тілдерді дамыту және архивтер басқарма басшысының орынбасары Мөлдір Увайдиллақызы құттықтау сөз сөйлеп, қатысушыларға алғыс хаттар мен сертификаттар табыс етті. Ол өз сөзінде ұлттық өнерге қолдау білдіру – ұлттың рухани дамуы мен мәдени тұтастығына қосылған зор үлес екенін ерекше атап өтті. Бұл бастама – қолөнер арқылы ұлттың бірлігін, тарихын және шеберлігін әлемге танытқан айтулы оқиға болды.