«Таза Қазақстан» жалпықалалық сенбілік іс-шарасы бүгін де жалғасын тапты. Шымкент қаласындағы тазалық жұмыстарына 3100-ден астам қала тұрғыны қатысып, 212 бірлік арнайы техника жұмылдырылды. 

Нәтижесінде қала аумағынан 182 тоннадан аса қоқыс шығарылды. 

Бұл акция еліміздің әр өңірінде жалпыхалықтық сенбілік, ағаш отырғызу, көше мен өзен-көлдерді тазалау сынды шаралармен жүзеге асырылуда. Қоршаған орта – ортақ игілік, оны таза ұстау әр азаматтың азаматтық борышы. Табиғатты аялау арқылы біз келер ұрпаққа жарқын болашақ қалдырамыз. «Таза Қазақстан» — тек экологиялық емес, мәдени және тәрбиелік маңызы бар бастама.

Бұл бастамаға Шымкент қаласындағы Жұмыспен қамту және әлеуметтік қорғау басқармасына қарасты орталықтардың қызметкерлері де белсене қатысып, жалпықалалық сенбілікке үлестерін қосты. Орталық қызметкерлері Абай ауданы Самал-3 шағынауданында өткен тазалық іс-шарасына қатысты. Сондай-ақ Керей хан, Барақхан, Арасан тау, Ойсыл баба және Серікбаева көшелерінде сенбілік ұйымдастырылып, оған 200-ден астам әлеуметтік қызметші қатысты. Сөйтіп ол аумақты қоқыстан тазартып, көгалдандыру жұмыстарына атсалысты.

Ұйымдастырушылардың айтуынша, бұл игі іс-шараның мақсаты – қаланың санитарлық тазалығын жақсарту, тұрғындар арасында экологиялық мәдениетті қалыптастыру және қоғамды қоршаған ортаны қорғауға жұмылдыру.

Қала әкімдігі өкілдерінің айтуынша, Шымкент қаласына қарасты бес ауданда өткізілген сенбілік жұмыстарына 2012 қызметкер атсалысып, 112 техника қолданылды. Жалпы 149,9 тонна қоқыс шығарылды. Атап айтсақ, Абай ауданында 400 қызметкер сенбілікке қатысса, тазалық жұмыстарына 15 техника жұмылдырылып, барлығы 42 тонна күл-қоқыс арнайы полигонға шығарылған. Ал Әл-Фараби ауданында тазалық жұмыстарына 335 адам қатысып, 22 техниканың күнімен 27 тонна қоқыс шығарыпты. 

Көпшілік қатысқан жалпықалалық сенбіліктен Еңбекші ауданының тұрғындары да қалыс қалмады. Олар да сенбілікке ұйымдасқан түрде шығып, 411 қызметкер өздеріне бөлінген учаскелерді 33 техниканың күшімен күл-қоқысты тазалады. Сөйтіп 15,7 тонна күл-қоқыс шығарды. Ал Қаратау ауданында жалпықалалық акцияға 440 қызметкер атсалысты. Сенбілік жұмыстарына 25 техника жұмылдырылып, 45,9 тонна күл-қоқыс шығарылған болатын. Жалпықалалық сенбілікке ұйымшылдықпен Тұран ауданының 426 қызметкері шығып, өздерінің азаматтығын танытты. Мұнда тазалық жұмыстарына 36 техника тартылып, шығарылған күл-қоқыс 18,3 тоннаны құрады.

Жалпықалалық сенбілікке қатысқан әлеуметтік қызметкерлер мұндай іс-шаралардың қаланың көркін арттыруға ғана емес, қоғамдағы бірлік пен ынтымақты нығайтуға да септігін тигізетінін атап өтті. Тазалық жұмыстары әлі де жалғасуда.