Жалпықалалық сенбілік арқылы қала тұрғындарының мәдениеті, көз қарасы, ұлттық құндылықтарымызға деген жанашырлығы артып келеді. 

Соның ішінде тазалық – мәдениеттіліктің, ұқыптылықтың белгісі. Қоршаған ортаға құрмет өз үйіміздің ауласынан басталады. Кеше Шымкент қаласында өткен сенбілік – табиғатқа жанашырлық танытудың бір көрінісі. 

Жалпы Шымкент қаласының аудан аумақтарында «Таза қала» жалпықалалық сенбілік іс-шарасы ұйымшылдықпен өтті. Қала әкімдігінің барша басқармалары, құрылымдық бөлімдерінің қызметкерлері белгіленген аумақтарда санитарлық тазалау жұмыстарын жүргізді.

Қала әкімдігі өкілдерінің айтуынша, «Таза Қазақстан» жалпыұлттық бағдарламасы аясында қалада сенбілік іс-шаралары тұрақты өткізілуде. Бүгін де қаланың аудан аумақтарында басқарма қызметкерлері, қала тұрғындары тағылымды іс-шарадан шет қалмай, жақсы іске жұмыла кірісті. Олар өзен-бұлақ бойлары, саябақтар, көше бойларын қоқыстан арылтты.

Дәстүрлі акция барлық аудан аумақтарында ұйымдастырылды. Қаланың тазалығы – баршаға ортақ міндет. Аудан ардагерлері, белсенді азаматтар оң бастамаға үнемі қолдау көрсетіп, ұйымшылдығын танытып келеді. Сонымен қатар қураған ағаштар мен бұтақтарды кесу, шөп шабу, ағаштарды әктеу, қоршауларды алу, аумақты қоқыстан тазалау және өзге де абаттандыру жұмыстары атқарылды.

«Таза қала» жалпықалалық іс-шарасы аясында Еңбекші ауданында да сенбілік жұмыстары жүргізілді. Аудан әкімдігінің қызметкерлері, ардагерлер, жастар, қаланың көркеюіне үлес қосып, тазалық іс-шарасына белсене қатысты. Жалпы, акцияға 400-ден аса қызметкер, 33 техника тартылды.

Сондай-ақ, Абай ауданы аумағында да тазалық жұмыстары атқарылды. 400-ден астам қызметкер, ⁠15 техника қураған ағаштар мен бұтақтарды алу, шөп шабу, ору жұмыстарын жүргізді. Санитарлық тазалау іс-шаралары одан әрі де жалғасын таппақ.

Жалпықалалық сенбілікке қатысқан мемлекет және қоғам қайраткері, Шымкент қалалық Қазақстан халқы Ассамблеясы жанындағы Ақсақалдар кеңесінің мүшесі Шалатай Мырзахметов табиғатты қорғау мен оны таза ұстау – әрбір азаматтың күнделікті өміріндегі басты ұстаным болуы тиіс деп атап өтті. «Қала табиғатты, қоршаған ортаны сақтау – келер ұрпаққа аманат. Бұл іс-шара жастарды табиғатқа жанашырлықпен қарауға, экологиялық сауаттылықты арттыруға және қоғамда белсенді азаматтық ұстаным қалыптастыруға бағытталған нақты әрі нәтижелі қадам болып саналады. Президентіміздің бастамасымен жүзеге асып жатқан «Таза Қазақстан» акциясына ел болып, халық болып қосылып, біз де бірлігіміз бен ынтымағымызды көрсетуіміз керек. Бірлік бар жерде тірлік бар. Қала тазалығы – баршаға ортақ міндет», - дейді ол.