Конституцияның 30 жылдығы – өткенімізді бағалап, болашағымызды айқындайтын тарихи белес. 

Ата Заңды қастерлеп, оның әр бабын берік ұстансақ, әділетті, өркенді, берекелі Қазақстанды бірге құрамыз.

Биыл біз тәуелсіздігіміздің темірқазығы, елдік мүдденің айнымас айнасы – Қазақстан Республикасының Конституциясының қабылданғанына 30 жыл толуын атап өтудеміз. Бұл – халқымыздың таңдау еркіндігі мен мемлекетіміздің іргетасын бекіткен тарихи күн.

1995 жылғы 30 тамызда бүкілхалықтық референдумда қабылданған Ата Заңымыз – еліміздің демократиялық, құқықтық және әлеуметтік дамуының берік негізі. Ол тек заң нормаларының жиынтығы ғана емес, елдің бірлігін, бейбітшілігін, татулығын сақтайтын басты кепіл.

Осы жылдар ішінде Қазақстан түрлі сын-қатерлерді еңсеріп, аймақтық қана емес, халықаралық деңгейде де орны бар мемлекетке айналды. Бұл жетістік – Ата Заңымыздың тұрақтылығы мен өміршеңдігінің дәлелі.

2022 жылы ел тарихында ерекше маңызға ие конституциялық реформа өтті. Халық референдум арқылы мемлекеттіліктің жаңа кезеңіне қадам басты. Бұл өзгерістер биліктің теңгерімді жүйесін қалыптастырып, Парламенттің рөлін күшейтті, азаматтардың құқықтары мен бостандықтарын қорғауды жаңа деңгейге көтерді. Реформа – шынайы демократия мен әділеттіліктің кепілі ретінде ел дамуына тың серпін берді.

Президент Қасым-Жомарт Кемелұлы Тоқаев ұсынған Әділетті Қазақстан тұжырымдамасы да осы реформалардың мәнін айқындайды. Әділетті қоғам – әрбір азаматтың заң алдында тең болуы, адал еңбек пен білім арқылы табысқа жетуі, жемқорлықтың тамырына балта шабылуы, мүмкіндіктің бәріне ортақ болуы. Бұл – жай ғана ұран емес, бүкіл қоғамның даму бағыты.

Конституцияның 30 жылдығына орай Шымкент қаласында «Мерейлі 30 күн» жоспары аясында түрлі іс-шаралар ұйымдастырылуда. Соның бірі – «Шым қала кештері». Осы іс-шара аясында Конституцияның 30 жылдығына арналған ашық аспан астындағы мерекелік концерттер өтті. Мерекелік кештер қаланың бірнеше нүктесінде – «Орталық» саябақ, «Арбат» алаңы, «Дендросаябақ», «Наурыз» саябағы, «Қазақстан–Түркия достығы» саябағы, «Металлургтер» саябағы және «17-шағын аудан» аллеясында ұйымдастырылды.  Апта сайын дәстүрге айналған «Шым қала кештері» концерті – қала  тұрғындары мен қонақтарына ерекше көңіл күй сыйлып, қала мәдениетінің дамуына серпін беріп, рухани мерекеге айналып келеді. 

Сондай-ақ осы «Мерейлі 30 күн» жоспары аясында Шымкент қаласындағы оқу-сауықтыру «Көктөбе» лагерінде Балаларды қолдау орталығының тәрбиеленушілері мен үй балалары арасында «Спорт – денсаулық пен құқықтық мәдениеттің бастауы» тақырыбында дәстүрлі спартакиада ұйымшылдықпен өтті.