Мемлекет басшысы Қасым-Жомарт Тоқаевтың тапсырмасына сәйкес елімізде білім беру инфрақұрылымын жаңғырту жұмыстары жүйелі түрде жүргізіліп келеді. 

Президент бастамасымен қолға алынған «Жайлы мектеп» және білім беру нысандарын реновациялау бағдарламасы – осы бағыттағы ең маңызды жобалардың бірі. Соңғы үш жылда республика бойынша 1300-ге жуық мектеп күрделі жөндеуден өтеді деп жоспарланған. Бұл ауқымды жұмыс балалардың қауіпсіз әрі сапалы білім алуына жағдай жасауға бағытталған.

Шымкент қаласы да бұл бастамадан қалыс қалмай, білім нысандарын жаңарту бағытында айтарлықтай ілгеріледі. Биылғы жылы қалада 9 мектепке күрделі жөндеу, 1 мектептің жылыту жүйесін жаңарту, сондай-ақ 1 балабақшаны жөндеу жоспарланған. Қазіргі таңда жоспарға енген әлеуметтік нысандардың басым бөлігінде жұмыс толық аяқталып, жаңа оқу жылына дайын күйде пайдалануға берілді.

Атап айтқанда, Дарынды балаларға арналған №1 мамандандырылған ІТ лицей-интернаттың бірнеше оқу ғимараты (Б, В, В1, В2, М, Д, Д1, Д2, Д3 блоктары) толық жаңартылып, заманауи ІТ-сыныптар мен зертханалар жабдықталды. Бұл лицейде оқушылардың ақпараттық технологиялар бағытында терең білім алуына барынша жағдай жасалған.

Сондай-ақ Ө. Жолдасбеков атындағы №9 ІТ лицейі, Ақпан батыр атындағы №10 жалпы орта мектеп, Мукими атындағы №13 мектеп, Ө. Жәнібеков атындағы №19 мектептің жылу жүйесі, Жамбыл атындағы №26 мектеп-гимназия, №75, №99 мектеп-гимназиялар, Хамза атындағы №108 жалпы білім беретін мектеп, №109 орта мектеп, сондай-ақ №97 балабақша ғимараттары күрделі жөндеуден өтті.

Бұл нысандарда жарықтандыру, жылу жүйесі, есік-терезе, шатыр мен еден жабындысы, сондай-ақ инженерлік желілер мен қауіпсіздік жүйелері түгел жаңартылған. Әрбір мектепте бейнебақылау камералары, дабыл жүйелері, өрт қауіпсіздігі құрылғылары орнатылып, балалардың қауіпсіздігі күшейтілді.

Жөндеу жұмыстары тек ғимаратты жаңалау ғана емес, білім сапасына да тікелей әсер етеді. Заманауи жөндеуден өткен мектептерге жаңа жабдықтар мен оқу құралдары жеткізіліп, интерактивті тақталар, цифрлық зертханалар, STEM кабинеттері орнатылуда. Мұғалімдер үшін де еңбек жағдайлары жақсарып, оқушылардың қызығушылығын арттыруға мүмкіндік кеңейді.

Шымкент қалалық білім басқармасының мәліметінше, биылғы жылы білім нысандарына жөндеу жүргізуге 1,7 млрд теңгеден астам қаржы бөлінген. Бұл қаражаттың барлығы мақсатты түрде игеріліп, мердігер компаниялардың жұмысы қатаң бақылауда ұсталған.

Қала әкімінің айтуынша Шымкенттің әлеуметтік және білім беру инфрақұрылымын жаңарту – әкімдіктің басты басымдықтарының бірі.

– Президент Қасым-Жомарт Тоқаевтың тапсырмасына сәйкес, әрбір бала үшін жайлы және қауіпсіз білім ордасын қалыптастыру міндеті тұр. Бұл бағытта қалада жаңа мектептер салумен қатар, ескі нысандарды жаңарту жұмыстары қарқынды жүргізілуде. Бүгінде жөнделген мектептердің барлығы жаңа кейіпке енді. Оқушыларға жайлы орта мен сапалы білім беру – біздің басты мақсатымыз, – деді қала басшысы.

Жаңартылған мектептерге барған ата-аналар мен педагогтар да өзгерістерге ризашылықтарын білдіруде. 

Жалпы алғанда, Шымкенттің білім беру жүйесін жаңғырту жұмыстары қаладағы әлеуметтік дамудың айқын көрсеткішіне айналды. Қаланың әр ауданында жаңа мектептер бой көтеріп, ескі ғимараттар жаңарып, оқушылар үшін қолайлы орта қалыптасуда.

Қорытындылай келе, білім беру нысандарын жаңарту — Шымкенттің келешегіне жасалған инвестиция. Әр баланың қауіпсіз әрі сапалы білім алуына мүмкіндік жасау – мемлекеттің стратегиялық міндеті, ал оны жүзеге асыруда Шымкент алдыңғы қатарда келеді.