Шымкент қаласында әлеуметтік әділеттілікті арттыруға бағытталған жүйелі жұмыстар жалғасуда. Қала тұрғындарына көрсетілетін жәрдемақылар мен қолдау түрлері жетілдіріліп, әлеуметтік қорғаудың жаңа форматы енгізілуде.

Президент Қасым-Жомарт Тоқаев Жолдауында елдегі әлеуметтік саясатты қайта қарау қажеттігін атап өтті. Мемлекет енді көмекке шын мұқтаж жандарға ғана қолдау көрсетеді. Бұл бағыттағы жаңа бастамалардың бірі — атаулы әлеуметтік көмекті әділ бөлуді қамтамасыз ететін скорингтік жүйе.

Шымкент қаласы бұл жүйені пилоттық аймақ ретінде енгізіп, қысқа мерзімде оң нәтиже көрсетті.

Жыл басынан бері 4 649 отбасы атаулы әлеуметтік көмекке ие болды. Бұрын мұндай көмекті алу үшін ондаған құжат жинау қажет болса, енді жүйе барлық мәліметті электронды түрде есептейді.

Жаңа әдіс арқылы отбасының табысы, жұмыс істейтін мүшелер саны, денсаулық жағдайы және бейресми кірістердің бар-жоғы автоматты түрде анықталады. Осылайша, көмек шын мәнінде мұқтаж отбасыларға ғана бағытталады.

Жобаға қатысқан мүгедектігі бар жандар мен көпбалалы аналар да оң өзгерістерді сезінуде. Мысалы, бұрын кезекке тұру немесе өтініш қаралуы ұзақ уақыт алса, қазір скоринг жүйесі кімге басымдық беру керегін бірден анықтайды.

– Қазіргі уақытта жүйеде 1 310 пайдаланушы тіркеліп, 242 мемлекеттік ұйым белсенді жұмыс жүргізіп отыр. Әрбір мекеме ақпаратпен жылдам бөлісіп, нақты әрекет етуге мүмкіндік алды. Бұл әлеуметтік әділдікті күшейтіп, қаражаттың мақсатты жұмсалуына жол ашты, – дейді Шымкент қаласы жұмыспен қамту және әлеуметтік қорғау басқармасының өкілдері.

Сонымен қатар, жобаның қауіпсіздігіне де ерекше көңіл бөлінген. Азаматтардың жеке деректері «Электрондық үкімет» жүйесінің қорғалған контурында өңделеді және тек рұқсат берілген жағдайда ғана қолжетімді болады.

Жалпы алғанда, жаңа модель әлеуметтік қолдаудың сапасын арттырып, мемлекеттік басқарудың тиімділігін күшейтті.

Шымкент тәжірибесі еліміздің басқа өңірлеріне үлгі боларлық форматқа айналып келеді.

Әділеттілік пен ашықтық – жаңа әлеуметтік саясаттың басты ұстанымы.

Ал Шымкент осы қағидатты іс жүзінде жүзеге асырып отырған алғашқы қалалардың бірі.