Шымкент қаласы аумағындағы жер телімдеріне жүргізілген кешенді зерделеу жұмыстары барысында құжатсыз салынған нысандар мен мемлекет меншігіндегі жерлерді заңсыз иелену фактілері анықталуда.

Талдау нәтижесінде бұрын салынып, қазіргі таңда құжаттары рәсімделмеген 2 314 тұрғын үй құрылысы нысаны тіркелді. Оның ішінде ең көп заңсыз құрылыс Абай ауданында – 1 493 нысан. Бұдан бөлек, Тұран ауданында – 283, Еңбекші ауданында – 251, Қаратау ауданында – 234 және Әл-Фараби ауданында – 53 нысан анықталған.

Зерделеу қорытындысына сәйкес, анықталған құрылыстардың 1 831-і тұрғын үй ретінде пайдалануға жарамды, ал 483-і – жарамсыз деп танылған.

Қала әкімдігі мен құзырлы мекемелердің бірлескен шаралары нәтижесінде жарамсыз 187 құрылыс нысаны мен үй салу үшін құйылған 63 іргетас бұзылды. Бұл жұмыстар заңсыз иеленудің алдын алу және қалалық құрылыс тәртібін сақтау мақсатында жалғасуда.

Ал тұрғындар тұрып жатқан, яғни жарамды 1 831 нысанның құқықтық мәртебесін реттеу мәселесі ҚР Азаматтық кодексінің 244-бабына сәйкес қарастырылмақ. Аталған бап бойынша өз еркімен орналасқан жер учаскесіндегі құрылыстарға меншік құқығын сот тәртібімен рәсімдеу мүмкіндігі бар.

Шымкент қаласының Жер ресурстарын басқару департаменті тарапынан жер учаскелерін нысаналы мақсатына сай пайдаланбау және үшінші тұлғалармен заңсыз иелену жағдайларын анықтау бағытында тұрақты түрде мониторинг жүргізіліп, тиісті шаралар қабылдануда.

Қала билігі заңсыз құрылыстар мен рұқсатсыз жер иелену фактілеріне қарсы бақылауды күшейтуді, сондай-ақ жер қатынастары саласындағы ашықтық пен тәртіпті қамтамасыз етуді басты назарда ұстап отыр.