Наурыз Бата

Oinet.kz 03-03-2022

Screenshot_2.jpg

Ұлысың оң болсын,

Ақ мол болсын,

Қайда барса да жол болсын!

Ұлыс бақты болсын,

Төрт түлік ақты болсын!

Ұлыс береке берсін,

Бәле-жала жерге енсін!

Ұлы халқым тоқ болсын,

Көйлектерің көк болсын!

Қайғы уайым жоқ болсын,

Қуаныштарың көп болсын!

Дәулетті бас берсін,

Бақытты ас берсін,

Ұлыстың ұлы күнінде!

Ұлыс оңға қонсын,

Қызың қырға қонсын!

Қозыға толсын көгенің,

Тұлпар болсын құлының.

Сүтті болсын құдығың,

Өрісті болсын жайлауың,

Ырысты болсын қыстауың!

Арыстандай болсын қайратың,

Аюдай болсын айбатың,

Гүлге толсын өңірің,

Көңілді өтсін өмірің,

Асқа толсын табағың,

Ашық болсын қабағың!

Үй-іші, ауыл-аймақ аман болсын,

Тыныштық баршамызға заман болсын.

Табиғат таусылмайтын ризық беріп,

Тартулы дастарқанға тағам болсын!

Күніміз ұлысты болсын,

Жеріміз ырысты болсын.

Өрісіміз малға бай, дүбірлі болсын,

Халқымыз жанға бай, үбірлі-шүбірлі болсын.

Ескі жылда есіркесін,

Жаңа жылда жарылқасын!

Саба іркіт пен саумалдан босамасын.

Өре құрт пен ірімшектен босамасын,

Мал ішсіз, келін құрсақсыз болмасын,

Түн ішінде түйе қомдатпасын,

Інгеннен айырып ботасын боздатпасын,

Қараңғыда ит ұлып, сиыр мөңіремесін,

Ата – ұлдан, ана – қыздан айрылып еңіремесін!

Тіл дамытуға арналған мәтіндер. Тауық, тышқан және құр
Бүгінгі ұрпақ Қыдыр атаға сене ме?


Сәйкес тақырыптар
Көтерілу
×