Шымкентте жастардың қаржылық сауатын арттыруға арналған кездесу өтті. Іс-шарада жеке қаражатты тиімді басқару, шығынды алдын ала жоспарлау, жинақ қалыптастыру және қарызға ұрынудың алдын алу мәселелері қозғалды. Бұл бағыттағы жұмыс «Қарызсыз қоғам» жобасының негізгі мақсаттарымен де үндеседі.

Кездесуге BI Group компаниясының мамандары қатысып, жастарға қаржыны дұрыс басқарудың қарапайым тәсілдерін түсіндірді. Мамандар табыс пен шығысты есепке алудан бастап, қаржылық мақсат қоюға дейінгі мәселелерге тоқталды. Ай сайынғы бюджетті жоспарлау адамның нақты мүмкіндігін бағалап, қажетсіз шығындарды азайтуға көмектесетіні айтылды.

Қаржылық сауаттылықтың маңызды бөлігі – несие мен қарыз мәселесіне жауапкершілікпен қарау. Жастарға қандай да бір несие рәсімдемес бұрын оның шарттарын мұқият оқып, пайыздық мөлшерлемені, ай сайынғы төлемді және жалпы қайтарылатын соманы есептеу қажеттігі түсіндірілді. Тұрақты табысқа сай келмейтін қаржылық міндеттеменің кейін қиындық туғызуы мүмкін екені де айтылды.

«Қарызсыз қоғам» жобасының басты бағыттарының бірі – азаматтардың қаржылық сауатын көтеріп, қарыз жүктемесін азайтуға ықпал ету. Бұл ұстаным жастар үшін де маңызды. Себебі қаржылық шешімді эмоцияға емес, нақты есепке сүйеніп қабылдау кейінгі тұрақтылыққа әсер етеді.

Кездесуде жинақ жасаудың тиімді жолдары да сөз болды. Қаржылық мақсатты алдын ала белгілеп, оған қажетті соманы есептеу және табыстың белгілі бір бөлігін тұрақты түрде жинап отыру күтпеген шығындарға дайын болуға мүмкіндік береді. Сонымен бірге күнделікті ұсақ шығындардың жалпы бюджетке әсерін бақылау ұсынылды.

Қазіргі таңда қаржылық операциялардың басым бөлігі цифрлық форматқа көшкен. Осыған байланысты жастарға банк қосымшаларын қауіпсіз пайдалану, күмәнді сілтемелерге өтпеу, карта деректері мен бір реттік кодтарды бөгде адамға бермеу жөнінде де ескертілді. Қаржылық сауаттылық тек ақшаны үнемдеумен шектелмей, оны қауіпсіз басқаруды да қамтиды.

Кездесу барысында жастар өздерін қызықтырған сұрақтарын қойып, мамандардан жеке бюджет жүргізу, жинақ жасау және қаржылық жоспар құруға қатысты кеңестер алды. Іс-шара соңында BI Group компаниясы тарапынан қатысушыларға арнайы сыйлықтар табысталды.