Шымкент қаласында құқық бұзушылықтардың алдын алу және тұрғындардың құқықтық сауатын арттыру жұмыстары жаңа форматта жүргізілуде. Абай ауданы прокуратурасының бастамасымен «Заң мен тәртіп» қағидаты аясында қала кинотеатрларында әлеуметтік бейнероликтер көрсетіле бастады.

Бейнематериалдар есірткі құралдарын тұтынудың зияны мен оның салдарын түсіндіруге, қайталама қылмыстардың алдын алуға бағытталған. Сонымен қатар жастардың заң талаптары туралы түсінігін кеңейтіп, әр адамның өз әрекеті үшін жауапты екенін ұғындыруға басымдық берілген.

Кинотеатрлардағы көрсетілімдер арқылы құқықтық тақырыптарды кең аудиторияға жеткізу көзделген. Көрермендерге арналған әлеуметтік бейнероликтер құқық бұзушылықтың адам өміріне, отбасына және болашағына тигізетін кері әсеріне назар аудартады. Әсіресе есірткіге байланысты құқық бұзушылықтар мен қылмысты қайталаудың салдарын түсіндіру профилактикалық жұмыстың маңызды бөлігі саналады.

Мұндай тәсіл құқықтық ақпаратты тұрғындарға күнделікті өмірде жиі баратын қоғамдық орындар арқылы жеткізуге мүмкіндік береді. Әлеуметтік бейнероликтер тек ескерту жасаумен шектелмей, азаматтарды заң талаптарын сақтауға, шешім қабылдағанда оның салдарын ескеруге және құқыққа қайшы әрекеттерден аулақ болуға үндейді.

Абай ауданы прокуратурасы құқық бұзушылықтардың алдын алуға бағытталған профилактикалық жұмыстарды алдағы уақытта да жалғастырады. Бұл ретте тұрғындардың, әсіресе жастардың құқықтық мәдениетін қалыптастыруға және қоғамда заңға құрметпен қарау көзқарасын орнықтыруға назар аударылады.

Құқықтық сауат пен жеке жауапкершілік – қоғамдық қауіпсіздіктің маңызды шарттары. Сондықтан алдын алу шараларына мемлекеттік органдармен қатар қоғамның да атсалысуы қажет.