Сауран ауданында «Ауыл аманаты» жобасы аясында 2,5 пайызбен жеңілдетілген несие мен субсидия беру және осы салаға инвесторлар тарту жұмыстары жүйелі жүргізіліп келеді. Мәселен, Ибата елді мекеніндегі жеке кәсіпкер Жасур Муминов 240 шаршы метр жерге балық шаруашылығын дамтуды қолға алған. Ол өз ісін жүзеге асыру үшін «Ауыл аманаты» жобасы аясында 2,5 пайызбен 8,5 миллион теңге несие алған болатын.

2023 жылы кәсіп бастаған кәсіпкер бүгінгі күні төрт бассейнде форель балығын өсіріп отыр. Жасур Муминов төрт тоғаннан жылына 4 тонна балық аулап, ішкі нарықты отандық өніммен қамтуға үлес қосып жүр. Қазір қожалықта 5 адам тұрақты жұмыспен қамтылған. Кәсіпкер «Ауыл аманаты» жобасы өз ісін ашамын деген азаматтарға таптырмас мүмкіндік екенін айтты. Бұдан бөлек, ауданда мал шаруашылығымен айналысып келе жатқан бірқатар шаруа қожалықтар балық өсіруді жоба аясында қолға алған. Соның бірі – «Иманқұл ата» шаруашылығы. Үшқайық ауылдық округінде орналасқан шаруа қожалығы ол үшін иелігінен 2 гектар жер бөлген. Тоған салып, су айдынын салуға 800 миллион теңге бөлген. Шаруа қожалығының иесі Иманқұл ата аймақта өзінің еңбекқорлығымен танылған жан. Ол мемлекеттік «Қарапайым заттар экономикасы» бағдарламасы арқылы қаражат алып, шаруа қожалығын дамытқан. 

Жалпы Түркістан облысында жүзге жуық балық шаруашылығы жұмыс істеуде. Өздеріңіз жақсы білетіндей, 2020 жылы Үкімет бекіткен балық шаруашылығын дамытудың 10 жылдық бағдарламасына сәйкес, өңірде 2030 жылға дейін 20 мың тонна тауарлы балық өндіру жоспарланып отыр.

Бүгінгі күні ауданда балық шаруашылығы бойынша екі ірі жоба жүзеге асырылған. Біріншісі – 1,2 гектар аумақта орналасқан балық өсіру кешені. Ол тоғандарға 2 миллион уылдырық салынып, 500 мың шабақ өсірілуде. Тоғаннан ауланған сазан балықтары Түркістан мен Кентау қалаларына өткерілуде. Ал екінші жоба аясында 3 тоғанда бекіре және сазан өсіріліп, алғашқы өнім нарыққа шығып үлгерген. Алдағы уақытта жылына 20 тоннаға дейін балық өсіру көзделіп отыр. Екі жоба бойынша жалпы 5 тұрақты жұмыс орны ашылған. Аудан әкімі Мақсат Таңғатаров өңірде балық шаруашылығын дамыту – ауыл экономикасын әртараптандыруға, тұрғындардың табысын арттыруға мүмкіндік беретін маңызды бағыт екенін атап өтті.

Балық шаруашылығы жобаларының дамуы экологиялық тұрғыдан да тиімді шешімдердің бірі болып саналады. Су ресурстарын ұтымды пайдалану, табиғи тепе-теңдікті сақтау және заманауи өсіру технологияларын енгізу арқылы тұрақты өндіріс циклі қалыптасуда. Мұндай тәсіл ұзақ мерзімді даму стратегиясымен үйлесіп отыр.

Алдағы уақытта ауданда осы бағыттағы инвестициялық жобаларды кеңейту жоспарлануда. Бұл жаңа жұмыс орындарын ашуға, ауылдық жерлердің әлеуметтік жағдайын жақсартуға және өңірдің агроөнеркәсіптік әлеуетін одан әрі күшейтуге мүмкіндік береді.

Сауран ауданы аумағында осындай өндірістік бағыттардың дамуы жергілікті тұрғындардың тұрақты табыс көзін қалыптастыруға және кәсіпкерлік белсенділікті арттыруға ықпал етуде. Сонымен қатар балық өнімдеріне деген ішкі нарықтағы сұраныстың артуы бұл саланың болашағы зор екенін көрсетеді. Жергілікті өндірістің жолға қойылуы арқылы тасымал шығындары азайып, өнімнің қолжетімділігі арта түседі. Бұл өз кезегінде өңірлік нарықта отандық өнімнің үлесін көбейтуге мүмкіндік береді.