«Нұр Отан» партиясының төрағасы, Елбасы Нұрсұлтан Назарбаевтың берген тапсырмасы бойынша Мәжіліс пен мәслихатқа баратын депутаттардың 50 пайызын 35 жасқа дейінгі жастар мен әйелдер құрайды. Кешегі күні өткен билік партиясының праймеризінде Түркістан облысы мен Шымкент қаласынан біраз нәзік жандылар бақ сынады. Олардың арасында жақсы нәтижеге қол жеткізгендері аз емес деп хабарлайды Oinet.kz тілшісі.

Рабиға Қуатбекова

Жалпы праймеризде депутаттық мандатты әлденеше рет иеленіп жүрген азаматтар көш бастады. Мәселен  Мақтаарал ауданын бақ сынаған Өмірзақ Мелдеханов – 62 пайыз, Нұралы Әбішев 46 пайыз дауыс алды. Бұған дейін Шардарадан депутат болған Рабиға Қуатбекова праймеризге Арыстан қатысып, мәре сызығына екінші болып келді. Жалпы, мәслихаттың осы жолғы шақырылымында  жалғыз нәзік жанды Рабиға Әбдімұсақызы екінші қайтара депутат болу мүмкіндігін толығымен қамтамасыз етті деуге болады. 

Рәшкүл Оспаналиева

Ал, облыстық мәслихаттың бұрынғы депутаты Рәшкүл Оспаналиева бұл жолы додаға Шымкенттен қатысып, 22 пайыз дауысты иеленді. Мегаполисте жақсы нәтиже көрсеткен нәжік жандылардың қарасы аз емес. Олардың қатарында Сайрамдағы қосалқы мектептің директоры Жадыра Таңатарованы, қалалық мәслихаттың депутаты Төрайым Сұлтанованы, бұрынғы басқарма басшысы, қазіргі уақытта колледж директоры Альбина Елшиеваны ерекше атап өтуге болады. Бұл азаматшаларды мәслихаттың келесі шақырылымынан ойып тұрып тұрып алатындығында күмән жоқ сияқты.  

Альбина Елшиева

Төрайым Сұлтанова

Шымкент бойынша көштің басында сондай-ақ, қазіргі депутаттар  Бекайдар Төлегенов, Марат Сапарбаев, Нұрғазы Бұқарбаев та бар. Үздіктердің қатарында кәсіпкер Шыңғыс Қозбахов та жүр. Облыста да, мегаполисте де праймеризде төмен нәтиже көрсеткен «действущий» депутаттар жетіп, артылады. Демек бұларға мандаттың қайта бұйыруы екіталай.