Мемлекет басшысы айқындаған «Заң мен тәртіп» қағидаты қоғамдық қауіпсіздікті қамтамасыз етуді және азаматтардың мүлкін қорғауды да қамтиды. Осы бағытта Шымкент қаласында ұрлықтың алдын алу, қылмысқа қолайлы жағдай туғызатын себептерді жою және қауіпсіз қалалық ортаны қалыптастыру мәселелері қаралды.

Шымкент қаласының Полиция департаментінде аудан әкімдіктері мен қалалық басқармалар өкілдерінің қатысуымен кеңес өтті. Жиында 2024–2026 жылдарға арналған «Ұрлықтарға қарсы іс-қимыл» бағдарламасының орындалу барысы талқыланып, тұрғын үйлерде, қоғамдық көліктерде және қылмыс жиі тіркелетін аумақтарда қауіпсіздікті күшейту жолдары қарастырылды.

Кеңесте қоғамдық көліктердегі бейнебақылау жүйелеріне ерекше назар аударылды. Камералардың үздіксіз жұмыс істеуі, бейнежазбалардың сақталуы және қажет болған жағдайда оларды құқық қорғау органдарының пайдалана алуы ұрлық деректерін анықтауға көмектеседі. Сондықтан тиісті құрылғылардың жарамдылығын тексеру және бақылау жүйелерінің тиімділігін арттыру мәселелері көтерілді.

Тұрғын үйлердің аулалары мен көшелерін жарықтандыру да күн тәртібіне енгізілді. Қараңғы учаскелерді анықтап, оларды жарықтандыру, сондай-ақ велосипедтер мен мопедтерге арналған арнайы тұрақтар ұйымдастыру мүлік ұрлығының алдын алуға мүмкіндік береді. Мұндай шаралар тұрғындардың күнделікті қауіпсіздігін қамтамасыз етуге және қоғамдық орындардағы бақылауды жақсартуға бағытталған.

Бұдан бөлек, мал ұрлығына қарсы іс-қимыл мәселесі қаралды. Кеңеске қатысушылар қараусыз жүрген жануарларды уақытша ұстау орындарын ұйымдастыру қажеттігін талқылады. Бұл бағыттағы жұмыс ауылдық аумақтарда малдың жоғалуы мен ұрлануының алдын алуға, сондай-ақ қараусыз жүрген жануарларға байланысты мәселелерді реттеуге мүмкіндік береді.

Ұрлықтың алдын алу тек полицияның жұмысы ғана  емес. Қалалық басқармалар мен аудан әкімдіктерінің үйлесімді әрекеті, инфрақұрылымның талапқа сай болуы және тұрғындардың сақтық шараларын ұстануы да маңызды. Осыған байланысты «Ұрлықтарға қарсы іс-қимыл» бағдарламасы аясындағы міндеттерді бірлесіп орындау мәселесі кеңестің негізгі тақырыптарының бірі болды.

Азаматтардың мүлкін қорғау, құқық бұзушылықтың алдын алу және қауіпсіз орта қалыптастыру бағытындағы жұмыс жалғасады.