«Тәні саудың – жаны сау» дейді халқымыз. Бұл сөздің астарында үлкен мән бар. Қазіргі қарбалас заманда денсаулық – ең қымбат қазына. Ал сол байлықты сақтап, нығайтудың ең тиімді жолы – спорт. 

Спорт – адам өмірінің ажырамас бөлігі ғана емес, табысты да бақытты өмірдің негізі.

Бүгінде әлемдік деңгейде көк туымызды желбіретіп жүрген спортшыларымыз аз емес. Мысалы, бокстан Олимпиада чемпионы Серік Сәпиев, ауыр атлетикадан әлемді мойындатқан Илья Ильин, мәнерлеп сырғанаудан тарихи жетістікке жеткен Денис Тен сынды саңлақтар жас ұрпаққа үлгі болып келеді. Олар тек медаль жеңіп қана қойған жоқ, сонымен бірге табандылықтың, еңбекқорлықтың, отансүйгіштіктің жарқын үлгісін көрсетті.

Біріншіден, спорт денсаулықты нығайтады. Үнемі қозғалыста болу жүрек-қан тамырлары жүйесінің жұмысын жақсартады, бұлшық еттерді шынықтырады, иммунитетті күшейтеді. Спортпен айналысатын адам сергек, шымыр, төзімді болады. Әсіресе оқушылар үшін спорттың пайдасы зор. Таңғы жаттығу немесе спорттық үйірмелерге қатысу сабаққа деген зейінді арттырып, есте сақтау қабілетін жақсартады.

Екіншіден, спорт мінезді қалыптастырады. Жаттығу барысында адам тәртіпке бағынады, уақытты тиімді пайдалануды үйренеді. Жеңіске жету үшін төзім мен табандылық қажет екенін түсінеді. Ал жеңіліс болса, оны мойындап, қайта тұрып күресуге дағдыланады. Бұл қасиеттер болашақта кез келген мамандық иесіне қажет.

Үшіншіден, спорт – достық пен бірліктің символы. Командалық ойындарда (футбол, волейбол, баскетбол) жастар бір-біріне қолдау көрсетіп, ортақ мақсатқа ұмтылады. Бұл өзара сыйластық пен жауапкершілікті арттырады. Спорт адамдарды ұлтқа, тілге бөлмей, ортақ жеңіс жолында біріктіреді.

Төртіншіден, спорт – арманға бастар жол. Көптеген балалар кішкентайынан чемпион болуды армандайды. Бірақ үлкен жетістікке жету үшін күнделікті еңбек, табандылық пен сенім қажет. Спорт адамға «қолымнан келеді» деген сенімді қалыптастырады. Бүгін ауладағы қарапайым жаттығудан басталған қадам ертең үлкен ареналарға алып келуі мүмкін. Сондықтан әрбір жас өз мүмкіндігін бағалап, арманына сенуден қорықпауы керек.

Бесіншіден, спорт – уақытты тиімді пайдаланудың мектебі. Қазіргі кезде жастардың көп уақыты телефон мен әлеуметтік желіге кетіп жатады. Ал спортпен айналысқан оқушы бос уақытын пайдалы іске жұмсайды. Жаттығу кестесіне үйренген бала тәртіпті болады, күнін жоспарлауды үйренеді. Бұл да – болашақ табыстың бір кілті.

Сонымен қатар спорт – ұлттық рухты көтеретін күш. Қазақ халқы ежелден атқа міну, күрес, көкпар, асық ату секілді ұлттық ойындарға ерекше мән берген. Бұл ойындар тек денені шынықтырып қана қоймай, батылдық пен намысты оятқан. Бүгінгі ұрпақ та ұлттық спорт түрлерін дәріптеп, салауатты өмір салтын таңдаса, еліміздің болашағы нұрлы болмақ.

Және де, спорт – жаман әдеттердің алдын алатын тиімді құрал. Бос уақытын пайдалы іске жұмсаған жасөспірім зиянды әрекеттерден аулақ болады. Спортпен шұғылдану адамға сенімділік береді, өз-өзіне деген құрметін арттырады.

Қорытындылай келе, спорт – денсаулық кепілі ғана емес, табысты өмірдің бастамасы. Әрбір жас күн сайын кем дегенде 30 минутын қозғалысқа арнауы керек. Өйткені бүгінгі белсенділік – ертеңгі мықты болашақтың кепілі. Спортты серік еткен ұрпақ – елдің тірегі, мемлекетіміздің жарқын келешегі.

Жұлдыз ДАСТАНҚЫЗЫ,

«Abylaikhan Bilim»  жекеменшік мектебінің

10 «А» сынып оқушысы