Шымкент қаласында «Қазақстанның үздік тауары - 2023» байқауының өңірлік іріктеу кезеңі аяқталып, оның жеңімпаздары марапатталды. Бұл іс-шараны ұйымдастырушылары Шымкент қаласының әкімдігі мен «Атамекен» Ұлттық Кәсіпкерлік Палатасының қалалық филиалы. Салтанатты іс-шараның марапаттау сәті қаладағы Арбат алаңында өтті. Онда байқау жеңімпаздары  үш номинация бойынша марапатталды. 

«Атамекен» Ұлттық Кәсіпкерлік палатасының басқарма төрағасының орынбасары Тимур Нақыпбековтың айтуынша, байқауға жүзге тарта кәсіпкер қатысқан. Байқау жүлдегерлерін тәуелсіз сарапшылар мен бизнес-қауымдастықтар, салалық қоғамдық бірлестіктердің өкілдері анықтаған екен. 

– Мемлекет басшысы Қасым-Жомарт Тоқаев Жолдауында шағын және орта кәсіпкерлікті дамытуға басымдық беріп отыр. Біздің ұйымдастырып отырған іс-шарамыз да осы кәсіпкерлерді қолдауға бағытталған. Жалпы жыл сайын өтетін әр байқауда жаңа тауарларды көреміз. Бүгін де кәсібін бастап, ішкі нарыққа кіре бастаған жаңа өндіріс орындарымен таныстық. Осы іс-шара арқылы кәсіпкерлер халыққа өз өнімдерін таныстырып, брендін қалыптастыруға мүмкіндік алады. Көрмеде қала тұрғындары «Осының бәрі өзімізде өндіріле ме?» деп тандануда. Бүгінгі қала деңгейінде анықталған жеңімпаздар жыл соңында республика көлемінде бақ сынайды. Тұрғындарымызға айтарымыз – күнделікті тұрмыста, құрылыста, жалпы барлық жағдайда тек отандық өнімді тұтынсаңыздар екен. Осындай қадамдар еліміздің өндіріс саласының дамуына, экономиканың ілгерілеуіне зор үлес қосады, - деді «Атамекен» Ұлттық Кәсіпкерлер палатасының басқарма төрағасының орынбасары Тимур Нақыпбеков. 

Шымкент қаласының кәсіпкерлік және индустриалды-инновациялық даму басқармасы тарапынан қаладағы дүкен сөрелеріндегі тауарларға талдау жүргізіп, басым бөлігі отандық өнім екенін анықтапты. 

– Қаламызда өндіріс орындары халықтың сұранысына сай дамып келеді. 2020 жылы басталған пандемияның өзі отандық өндірістің дамуына алып келді. Біз жуырда дүкен сөрелеріндегі құрылыс пен тамақ өнімдеріне талдау жасап, тауардың 70 пайызы өзімізде өндірілген отандық өнім екеніне көз жеткіздік. Геосаяси жағдайға байланысты импорт көлемі азайып, еліміздегі кәсіпорында өндірілген тауарларға сұраныс артып отыр, - деді Шымкент қаласының кәсіпкерлік және индустриалды-инновациялық даму басқармасының басшысы Береке Дүйсебеков. 

Байқау қорытындысы бойынша «Өндірістік мақсаттағы үздік тауарлар» номинациясымен «Ak-su» корпорациясы, «Asia Trafo» және «Medcomfort» кәсіпорындары марапатталды.  «Халық тұтынатын үздік тауар» номинациясына «Бал Текстиль», «ШымКай», «Әлем БТ» лайық деп табылды. Ал, «Рахат», «Van elle» және «Sweet ideas» кәсіпорындары «Үздік азық-түлік тауарлары» номинациясы бойынша марапатталды.